Ваньмыз сярысь

Кызьы адямиос огназы уло?!? Мон мӧзмыса кулко ин. Киме но, пыдме но выртэме уг поты. Сиён сярысь вообще уг но вераськы ни. Ӝытаз кык пол чай гинэ юисько. Туннэ бен умудрилась макарон пӧзьтыны(!) Нуназе трос ма карыны вуи мкш. Комнатаын огнам пукисько, тылме но даже уг ӝуатъяськы. Пичи дырысеным сыӵе привычка кылемын лэся. Мамаос кема уг ке берто вал гуртэ, мон диван вылэ пуксьыса витько вал соосты, пеймытын. Мыным капчигес вал озьы, синъёсы пеймытлы дышыса, малпасько вал мон, нечистой силаез но ӝоггес адӟо шуса и мар ке карыны вуо шуса. А тыл ӝуатыса соос штора сьӧрын ватскыса возьмалозы малпасько вал. И кӧлыны но усьтэм занавесъёсын мон уг быгатӥськы, кин ке монэ адӟоз кадь потэ и синуськытоз. Оломар но. Комнатамы татчыозь укномы гольык. Ошоно вал ни чебер тюль...

Туннэ педсовет ортчиз школаын. Кык но ӝыны час визьмо кылъёс, кылъёс...Мон настоящий дышетӥсь ӧвӧл на лэся. Таяз арын аттестоваться кариськоно, пе, нырысетӥ категорилы. Нош али мон категоритэк дышетӥсь лыдъяськисько.

Педсовет бере шонтӥ "Мынам Удмуртие" телерадиокомпание "Светӥ доры куное". Светлана Михайловна Кибардинаен Шундыкарын тодматским вал. Пумен ӧтиз и монэ куно чотын. Эфир аслым кельшиз кадь, капчиен туж ваньмыз кошкиз, лулысь-сюлмысь-а мар-а вераським шуод. Кин ке кылзӥз, олокызьы йӧтӥз вылды. Ну кызьы вань, вань ни. Верай, кызьы вань.

Туж мӧзми ни нылпиосылэсь. Туж жаль потэ одӥгез классэ, нокызьы но люкыны уг быгатиськы. Ваньзы но туж матынэсь мыным, бадӟым ӟечокъёс! Соосын ик ми ар пумын усьтэм урок возьматӥм вал, пичияк артистъёс луылӥм, англи кылын пьеса пуктӥм вал. А табере мыным соосты ӝынызэ сётоно. И дышетӥсьсы но туж монэ кыксэ ик группазэ кутыны косэ. А мынам сюлмы пилиське. И пиналъёс сярысь нокин но уг малпаськы лэся. Соослы кыӵе стресс луоз нош, дышетӥсь воштӥськиз ке. Котькытын принципы, принципы...

Огнам улыса кутске ни мынам трос буква. Ӵуказе Васяе вуиз ке городэ, возьмалоз ни сое трос кыл,дыр. Не урод, ни в коем случае.  Просто кема уг ке вераськиськы, мынам озьы луылэ. Хотя нуналаз олокӧня пол зулиськом, ужзэ вис карыса, ӝегатыса но.

Выль дышетӥсь

Школае ветлӥ. Удмурт классэлэн дышетӥсенызы план воспитательной работы лэсьтӥм. Олокыӵе но ужрадъёс гожъям, малпам. Со сяна но туж трос классной но, школьной но ужрадъёс тыраз. Мискинь пиналъёс, малпай. И дышетӥсьёс но, конечно. Ку вуттом меда ваньзэю А кулэ.

Выль дышетӥсез, кудӥныз мон ӵош ужало так и ӧй адӟы. Пичи каморка милем сётыны ӧдъяло ик лэся. Куштэм, кулэтэм партаосты пуктыны. Мед хоть озьы. Кытчы лыктыны, кылиськыны хоть луоз.

Вань привилегиос, конечно, тӥ понна луозы, Лилия Николаевна, шуиз завучмы. Ми ведь, пе, тодӥськом, кызьы тӥ ужаськоды. Мукетыз нылаш, кудӥз лыктоз мед пе кабинет утчаса ветлоз средней звеноысь, а мон пе классэ ик кылё, кинлэн урокез ортче. Мар бен шуисько озьы кариськоды. Выль дышетӥсьты сразу кышкаса кошкоз, мыным кыӵе вал секыт кылем арын. Номыре уг тодӥськы, нокинэ уг тодӥськы, элементарно школаын гинэ йыромисько вал. Ачим хоть морально юртто ин та выль дышетӥсьлы. Аслым но юлтош хоть луоз. Мед гинэ лыктоз. И мед гинэ тупалом. 

Сюрес вылын

Таяз гужеме сюрес вылысь ӧм но бырылэ. Весь кытчы ке но мынӥськом, кытысь ке но бертӥськом. А мыным яра озьы ветлын. Пассажирской пукон вылын, йыры оглань-талань берга. Оломае но адӟисько. Эшшо одӥг интыям пукыны уг быгаткы, тэтчаса, эктыса ветлӥсько. Васяе жаде но дыр но, может со понна ик яратэ.

Уваысь бертыкумы Иж пыр ӧм бертэ, Удугучин, Старые Зятцы пыр шонтӥм. Котьку мечтала Удмуртиез машинэн ортчыны! Йыромим шуса малпам вал ин, интуиция мынӥм малы ке шуоно. Сэре Вася кыӵе  ке трактористлэсь юаз но, шонер пе мынком! Кӧня шумпотон вал, да эшшо тракторист удмурт сямен вераськем на!

Тазьы ветлӥськод но, котькудӥзлэн ведь аслаз гуртэз вань шуса млпаськод. Котькудӥзлэн аслаз бакчаез, кытысь со али картошка копка например. Туж потэ на уйпалэ вуллэме машинаен ик! Шор но лымшор Удмуртиез более менее объездили ин кадь.

МИНЗДРАВ ВЕРА, ТАМАК КЫСКОН БЫДТЭ ТАЗАЛЫКТЭС! 

Мон уг кыскиськы и нокинлы но уг дэмласькы!!!

Сяськаос, сяськаос...

Июле на мамалэсь сяськаоссэ фоткатьтӥ вал. Так и куштыны татчы ӧй вуы. Али бен азбарын эшшо но чебергес на, только нош фоткатьтын ӧй вуы...

Удмурт пӧраськись ӟуч кафеын

Сестрае эшеныз Ижысь одӥг кафешкаын ужало. Удмурт сямен, пе, лабыр вераськиськом. Эшшо мукет удмуртъёсты шедьтэм на, соосын но пе только так удмурт кылын вераськиськом.

Казахстанысь-а, Узбекистанысь-а пӧраськисьсы вань,пе, и соосты иностранецъёс шуэ,пе. Кин татын иностранец ай шуэм сестрае. Удмурт кылъёслы дышетко пе ӵош ужась эшъёссэ. Официантъёслы, шуэ, словарь лэсьто ай, кызьы удмурт сямен заказзэс верано. Удмурт кырӟанъёс но кылзӥсько, лэся. Одӥгез ӟуч пизы Богданлэськудзэ ке кырӟанзэ наизусть тодса кырӟа.

Сыӵе шумпоттӥсь иворъёс вера вал сестрае до недавнего времени. Алигес директорзы замечание лэсьтэм, эн, пе, вераське удмурт кылын! Бригадирзылы, пе, уг яра, ужысьтыз кык часлы аж азьлогес кошкем, пеляз пыре удмурт кылын вераськемзы шуса! Мон вал сыӵе возмущена, что кылъёс ик шедьты ма вераны. А ма шуко директордылы шуид на но. Татын мынам сестре понна гордость кутӥз. Мон, шуэм, пичи дырысеным удмурт кылын вераськисько, мыным соин капчигес общаться, тем более удмуртъёсын, всё равно вераськом,пе.

Мон бен бригадирзы шоры туспуктэмысь учки но, туж недалёкой кышномурт потӥз, озьы умой ӧвӧл, конечно, адямиос сярысь вераны, уд ке тодӥськы лично тем более. Но, вождэс эн вае, задели за больное!

Выль дышетскон ар вуэ

Ветлӥ туннэ медосмотрэ. Выль дышетскон ар вуэ ин! 21 августэ часъёсты распределятьтын ветлӥ вал. Мылкыды ик куашказ. Мар со дышетӥсьёслэн часъёс, классъёс понна выремзы. Сыӵе чебертэм асьсэды возё, кабын базарын кадь потӥз.

Одӥгез началкаысь дышетӥсь куриз вал классысьтыз кыкезлы ик группаезлы монэ. Мон верасько вал сое но, завучмы, по совместительству англи кылэн дышетӥсь ик, кеськиз дак шорам, аж синъёсыз ик пото вал ин. Ма вераны ик пайми, бен шуко мон верасько гинэ ук. Капец кыӵе секыт сыӵе коллективын ужаны.

Таяз арын нош кыӵе ке егит дышетӥсь колледж бере лыктэ,пе. Кылем арын ӵош одӥгеныз лыктӥм вал но, соиз благополучно пегӟиз мукет школае. Ми началкае кык дышетӥсь кыльком. А кытын шуисько урокъёс одӥгез ортчытоз, мукетыз классэ ик кылиз ке но, со, пе, милям проблемаосмы ӧвӧл. Кызьы шуко ӧвӧл, мынам ук со проблемае. Мын но мукет завучен вераськы,пе. Магнитофон но шуко кулэ луоз, нош ас нимысьтым гожтӥ директорлэн нимыз вылэ курон.

Таӵе моментъёсы мылкыд ик кысэ ужаны. А пиналъёсылэсь мӧзми ин. Бен нырысь-валысь ик пиналъёс мыным кужым сётӥзы вал ужаны но, азьланяз но видимо озьы луоз.

Фестиваль деревянной скульптуры

Толон ӝыт Иже лыктӥ туннэ Увае мынон понна. Отын I Международный фестиваль деревянной сульптуры "Древо жизни" ортчиз. Удмуртиысь 40 пала мастеръёс люкамын вал, но эшшо лыктэмын вал Даниысь, Бельгиысь, Новой Зеландиысь усточиос.

Вася Даниысь но Новой Зеландиысь эшъёсыныз

И мынам но, конечно, зарни мастере Шундыкар бере сразу отчы шонтӥз вал. Соос быдэс арняэ "Ува" санаториын шутэтскизы. Ну кызьы шутэтскизы, азьло ик ужазы, конечно. И зол ужазы!

Вуэм берам, мон азьло ик интыезлэн чеберезлы пайми. Сыӵе отын ганяк, чалмыт, туж чебер тымет, ваньмыз утялтэмын. Кылем ик татчы потэ кадь.

Кыдёкын сьӧд дӥсьёсын адямиос бызьыло шуса адӟи, кыӵе ке скульптураез ӝуто кадь. Отын ӧвӧл меда мынам но мусое шуса соос пала вамыштӥ. И не прогадала. Самой шумприч ваньзы пӧлысь бызьылэ кадь, дото деловой! Сыӵе Васяе мыным мусо потӥз! Родной-родной. Кунгож сьӧрысь куноослэсь пукто вылэм ужъёссэс, санаторий корпус азьпала ик. Зэм ке, мыным соос ӧз кельше. Ну не милям и всё. Вася шуиз сэре, соос, пе, сыӵе писпуэн ужаны дышемын ӧвӧл, да и дырыз ӧжыт вал,пе.

Пукто ужез

Бельгия

Новая Зеландия

Дания

Удмурт мастеръёслэн ужъёссы тропа здоровья кузя интыямын вал. Ми Васяеным кошким соосты учкыны, туспуктыны. Мар мон адӟи! Кыӵе кулэ талант луыны, огшоры корлэсь сыӵе шедевръёс лэсьтыны! Мон, конечно, Васея тодко, что невозможного вообще номыр ӧвӧл! Но татын!...Кылъёс ик ӧвӧл.

Ува ёрос

Шаркан

Алнаш

Яр

Вуж Монья

Нош мусое лэсьтэм ӟусъёс но валъёс. Проектазы соос вылымтэ, кстати. Ачиз, шундыкар бере лэся вдохновлённый, мыныса проектироватьтэм и лэсьтэм! Мон нош ик синмаськи солы и валъёсызлы но!

Ваулиналы интервью сётыкуз, валай, мар значит соослэн композицизы. Шораз ик сылэ Инву мумы, солэн киысьтыз ву вия, но кык шурлы пӧрмыса кошке. Ӟусъёс-со кык шуръёс, узорез но ӟус вылаз вуэз возьматэ, пе. Нош берло со шуръёс валъёслы пӧрмо. Мыным со валэктонзы туж яраз, сюлмам ик кылӥз. Табере мар ке валъёсын потэ мынам, пелям яке чыртыям)

Награждение дыръя спонсор куинь поощрительной кузьым сётӥз вал. Мон малы ке тодко вал, Васез вералозы шуса. Сыӵе данъяськон мылкыд бугырске ялан, куке мар ке но умойзэ лэсьтэ дуно адямие, а лэсьтэмзэ эшшо пусъё ке на, инбамозь ик тэтчаны дась. Ваньзы азьын бен уг тэтчаськы ни, огнамы дыръя гинэ)))

Шундыкар 2014

Бер кунян! Бен, со мон. Ноутэ но ӧй вал, инетэ но.

Шундыкар. Табере мон валасько, малы адямиослэн синъёссы ӝуатско, сое кылыса. Шундыкар! Мылкыд бугырске, давление ӝутске, сюлэм ӝоггес йыгаськыны кутске. Яратонлэн признакъёсыз. Бен, кин ветлӥз Шундыкаре, ваьмыз синмаськемын, дыр, солы.

Мон Шундыкаре нырысьсэ ветлӥ. И вожатой луыса гинэ. Мон сыӵе жаляй, пинал луыса отчы ӧй вуылы шуса. Школаын дышетскыку нокин но ми палась уг но ветлы вал кадь. Дышетӥсьёс но, анайёс но урод ужаллям. Али но бен туж ик уг тыршо кадь...

Мынонлэсь азьло ик тодко вал, секыт луоз шуса. Вожатойёс ваньзы егитэсь, ужамзы, опытсы ӧвӧл. Ваньзэсты уг тодӥськы, тодӥсько ке но, вылтӥз-вылтӥз гинэ.

А эшшо, куке ваньзы дасяськизы открытилы да мар да ДДНын, Лиля сюантӥ калгыса ветлӥз. Так что, городэ мыныкум 9 ӵукна, ваньзы звонитьто вал ин, кытын тон шуса. Нылъёсы (дӥськут дизайн отряд мынам вал, чистоназы нылъёс)"Русский дом" дорысен ик туж яразы. Но, жаляса верано, мон вань нормальной адямиос кадь ӧй мыны лагере. Вань автобусъёс кошкизы, а мон отчы ик парк доры кыли. Вуи обед котырын гинэ, и то нылъёсы доры мыныны сразу ӧз кемды, и сиськи но мон огнам. Сыӵе шулдыр Шундыкаре кутскиз.

Собере бен ӝог гинэ ӧраз пыри кадь. Нылъёсы зэм но классноесь вылӥллям! Плакат но пумен суредазы, эктон но только так асьсэос, монтэк, пуктӥзы. Мон туж выри соосты ог огзылы матэ карыны. Зэмзэ вераса, адскемзы бере ик, Ижын ик. Дискотекаосын кругын ваньмы ӵош ми эктӥм, отын ик китӥмы кутскыса тылгизьы но лэзьям, фотосессиос но ӵош лэсьтылӥм. Сюлмы берло тыре вал, куке  ог-огзэс поддерживать каро вал, котькытын весь ӵошен ветло вал. Ужрадъёсын сцена вылын выступать каремзэс шоканме дугдытыса ик учкисько вал. Дас нунал куспын туж но туж матэ луи нылъёсылы. Тырши соослы эш но, апай но луыны. И куке одӥгез нылы шуиз,  мынам тон кадь луэме потэ шуыса, тыбырам бурдъёсы потӥзы,дыр...
Мон туж оскисько, ваньмынызы герӟет возём шуыса.

Кыӵе ке журналэ гожтӥськыкум адӟи вожатойёслэсь вордӥськем аръёссэс. Мда уж, малпай. Пересь ик аслым потӥ, чесслово. Секыт ик йӧтӥз нылъёслы-пиослы. Ма эшшо бы! Толон гинэ пиналэн ветлэмын Шундыкаре, а туннэ вожатой ин! А кудъёсызлэн воксё но ветлэмзы ӧвӧл, пиналъёсын ужан опытсы но ӧвӧл! Туж трос пыр ортчим, керетонъёс но вал, ӟыгырскыса сюлмысь вераськонъёс но. Аня, Жанна, мон тыршимы кадь юрттыны, наставник-а мар-а луыны шуод. Куддыр может ӧз но валалэ милемыз, куддыр йырзы но кур луэ вал вылды. Но мон сюлмысь оскисько, ваньзы соос туж будӥзы та смена куспын, троссэ валазы, троссэ йыразы кельтӥзы шуыса! Мон понна со вал туж туж бадӟым опыт. Куинь ужрад ньыль час куспын Шундыкарын гинэ дасяське,дыр. А уйин вожатойёслэн кӧлэмзы потэ вал, не до ужрадов.

Мон первый и последний раз вожатой вал. Сояз арын, жаляса верано, мон уг мыны ни. Лучше вордо но будэто нылпиме, кудӥз одно ик мыноз "Шундыкаре"!

Шаркан-Бӧдья рейс

Шаркан -Якшур-Бӧдья. Сыӵе рейсо автобусэ пукси.Та маршрутъя ӵем ветлӥсько,только машинаен. Авттбусэн одӥг пол но ӧй на.
Шарканын вокзалын да центрын калык пазикез тырмытэ.Тросэз пыд йылазы ик сыло. Мынам таӵе автобусъёсын ветлэме туж но туж шер,мкш Порозозь райцентрысь автобусъёс уг ветло,матын шуса. А вот Зюзяс и Сосновкаос туж умой тодо,дыр, ма со сыӵе.
Пырем адямиос ӟольгыриос кадь ӟабыль каро. Удмурт кылын. Сыӵе мусо. Ӟуч сямен нокин но уг вераськы. Ымныръёссы но ваньзылэн кыӵе ке но матынэсь дуно. Тёп-тёп удмурт ымныръёс.
Ӝыныез Ляльшуре но Сосновкае пото.
Мае но автобус укноысь уг адӟиськы!Сомында чебер сяськаос!Машинаын мыныку ваньзэ сое адӟыны уг луы.
Котькуд гуртын кин ке но пуксе. Мукшиын кык кышномурт пуксиз.Ӟуч кылын верасько. Асьсэос удмуртъёс. Ми палъёс татын ӧвӧл шуо. Малы ӟуч кылын верасько? Вылтӥяськон-а со или ма?
Кесвайын егит кышномурт пусиз. Бордаз пичи нылыз. Ну невозможно мусо! Эшшо и удмурт кылын вераське. Пукись кышномуртъёс юало:
-Автобусэн мыном,-шуэ визьпог.
-Бӧдьяла-а мыниськод?
-Оо
-Конфет-а сиемед потэ?
-Оо
Мамаез шуэ,со,пе,мынам кык кылын ик вераське. Алфавитэз но кык кылын ик тодэ,лыдъяськын но дасозь быгатэ. Аслыз нылпырылы 4 яке 5 арес ай!
Романтично ветлын автобусэн. Как ни крути.