Лапик

Папа туннэ Лапикез ватӥз. Жаль но туж, капчигес но луиз кадь.

Мон ньылетӥ-а, витетӥ-а классын дышетскисько вал, Элябас дорысь кучапи васькытӥ. Сыӵе со туж пичи гинэ вал. Нырысь уйзэ улӥын коробкаын со кӧлӥз. Точнее, быдэс уйзэ вузыса но нискетыса улӥз. Да что за кучапи, кӧлны но уг сёты шуса быдэс уйзэ валес вылам бергам. Нош ӵукна султыса кучапиенымы бызьылӥм, шудӥм.

Малы ке но семьяямы вань корка пудо-животъёслы мон ним тырылӥ. Тазэ ӧй тоды кызьы ниманы, мамалэсь юай, кызьы соослэн пунызылэн нимыз вал Кион-Липетоын улыкузы. Лапик, пе. Озьы ик нимам. Лапик. Мусо. Дядяе со пышкылыса Пыдӥк шуэ вал.

Лапик, Лапик. Сыӵе со мусо потэ вал. Гонэз кыӵе ке но сайкыт, персиковый. Нырыз пеймыт льӧль, котьку но кезьыт, озьы ик луыны кулэ. Кӧня ми со нырзэ исаса улэмын... Быжыз котьку но кульчое биниськемын.

Лапик, Лапик. Со воксё но лек пуны ӧй вал, визьмо. Синъёсыз но туж проницательноесь. Лек ӧй вал ке но, ужзэ аслэсьтыз тодэ вал. Корка котыр- со солэн территориез. Ми утэмезъя валаськом вал, ма солэн верамез потэ. Кин ке  мукет адями пыре ке-мызон утэ, сиськемез ке потэ-мукет, пуныосты ке шӧдэ-мукет.

Лапик, Лапик. Сомында ар ӵоже тон милям семьямылэн ёзэз луид. Мон али вообще не представляю Лапик  интые кыӵе ке но мукет пуныез. Ми соин будӥм, ми кошким дышетскыны, со кылиз. Но бертэммылы быдэ со милемды тодма вал, интыяз тэтчаны кутске вал.

Э, Лапике. Берло кык аре вообще туж зол шӧдӥськиз пересьмемез пунымылэн. Азьло синъёсыз бездӥзы. Сэре валам, уг но кылы ни шуса. Но зато ульча кузя ветлыны, ӧсъёсты усьтыса азбаре пырыны вала вал. Мама кемалась вера вал ни, усыпить кароно ни вал та пересьмес шуса но. Мон ӧй лэзьы. Туж секыт быръён ук со! Сомында споръёс мыно адями эвтаназия сярысь, нош татын пуны. И сыӵе секыт! Мон шуисько вал мамалы, со быгатэ на ук сиськыны, ветлыны, шоканы, улыны, кызьы виёд сое?!

Таяз выходнойёсы бертылыкум, мон валай, КЫӴЕ со курадӟе шуса. Пельёсысьтыз оломар быдэс ымныраз сутыса васькемын ин, синъёс уг адӟо, пельёс уг кыло, пуны пушкысен СИСЬМЕ ин! Мыным урод луиз, зэм. Соку мон доры дошло, со издевательство шуса. Папаез бӧрдыса сямен кури медаз ни курадӟыты шуса, мед усыпить кароз ни шуса.

Туннэ ватэм...Половике бинялтыса ватӥ, пе...Умой кӧл ни, Лапикмы! Вождэ эн вайы сомында курадӟытэммы понна...

Удмуртятаос

Удмуртятасылы (завучмы озьы шуэ) Сепысь пиналъёслэсь лэсьтэм "Мультиксэс" возьматӥ. Пайми но шумпотӥ. Троссэ валазы, кылӥзы. И как раз сыӵе кылъёсты ик дышетӥм вал: писпу, сюрес, корка...Мукетъёссэ кылем ар тырысь тодо. Дышетӥсьсы но паймемын вал. Туж троссэ тодамы вайимы со мультикез учкыса: нимез, аресэз веран, буёлъёс, животъёс, сиён, каронкылъёсты. И ваньмыз со сыӵе аспӧртэмлыко формаен. Ми котькуд пиналлэсь верамзэ пыр-поч эскерим, удмурт но, ӟуч но кылын выльысь вераса потӥм.

Мон ӝыны та ӝыны классэз англи кыллы но дышетӥсько. Туж тунсыко чакланъёс аслым лэсьтӥ. Милям кыкетӥ классъёс вить параллель, ваньмаз ик классъёсын мынам урокъёсы вань. Так вот, тужгес но ӝог схватывают и йыразы кельто как раз-таки удмуртятаосмы! Маин со герӟаськемын, мон пырак вераны, конечно, уг быгатӥськы. То ли, дышетӥсьсы зол луэмен, то ли одӥг "иностранный" кыл дышето ин-а шуса. Удмурт кылэз ведь соос иностранноез кадь дышето. Али но син азям сыӵе сцена, куке мон юай-эскери кылъёсты, кудъёссэ ми вуим ни англи кылын дышетыны, соос ваньзы интыысьтызы тэтчаса ик вераллязы мыным со кылъёсты. Нош мукет классъёсын одӥг-кык адями гинэ вераны быгатӥз, и туж но туж секыт мынӥз ужмы.

Четверге нуназе милям англи кыл, нуназе бере-удмурт. Тодӥм вал выль кыл: писпу. А ведь, шуо, англи кылын писпу-tree. Кыӵе тӥ ӟечокъёс, шуисько! Соос мыным куинь кылэз ӵошатыса кык цепочка веразы ини. ПИСПУ-TREE-ДЕРЕВО. КУАКА КАР-NEST-ГНЕЗДО. 

Медаз мылкыдзы кысы вылэм кылъёсты дышетыны!Тьфу-тьфу-тьфу!

Эляба

Эшшо та выходнойёсы ми Порозэ но Кекоранэ но вуылӥм. Дото чупыресэсь бен!)

Вань ӵыжы-выжыосме Порозысь адӟыны вуи. Пичи нылмес яратӥ. Мазэ вешаны но вань ин даже! Позитивчик!

Элябабен трос вуим вераськыны. Паймыса уг быдтӥськы мон солы! Мае но уг тоды, осто! Бен газет лыдӟе, телевизор учке, радио кылзӥське. Ооо, шуэ, кыӵе адямиос вуиллям, радио-телевизорысь,пе, ӵемгес тӥледыз адӟиськом-кылӥськом ми. Ой, Эляба. Мон сое озьы гинэ шуко.

Богданэн Оля Тронинаен Америкае ветлӥллям шуэ. Юля Никитина бызем но Шапкина луэм шуэ. Да ӧвӧл, шуко, Шахтина. Да пе Шапкина шуизы. Ӧвӧл, ӧвӧл шуко. Э,пе, мон озьы кылӥ. Бен пе, газетын быдэс разворот со сярысь гожъямын, Америкаысь бертэмез бере радиое но ветлӥз ин. Кинлы быземме верай, но мамае паймиз, пе, шуэ. Элябен дедоен Юлялэсь мамассэ тодо но, соин матын-а мар-а потэ со соослы. Озьы маде.

Со вань кырӟасьёсты в лицо тодэ, арлыдооссэ но, егитъёссэ но. Куке "Елена" кафее Влад Андреевъёс да мар да вуылӥллям. Так Эляба кытысь ке кырӟамысь бертэ вылэм но, доразы лыктыса тыбыразы ик вешам) 

Куке сентябрь кутсконын на звонитьтэ мыным и шуэ, Дарали, пе, радиое ветлӥз. Сарапулэ, пе, улыны кошкисько шуиз. Олома, конечно, Дарали вераськем ин но, таиз сюлмаськыны кутскем ин. Соос чӧш сюанэ Порозэ кемдылӥллям, соин ик тожо тодмо адями каре. Мон маке трубкаме кутыны ӧй быгаты соку ик, 3-4 пол звонитьэмын вал. Ваньзэ, шуэ, малпай ин, кызьы "Дартэз" но, "Сахарез" но улоз. Да, шуисько, эн сюлмаськы ай. Шуак озьы султыса уз кошкы ай))) Олома но.

Яра мыным соин вераськыны. От души. Только вот пыдыныз курадӟе туж(((( 4-5 ар талэсь азьло,дыр, толалтэ сике куасэн мыныса, усем но, пыдзэ чигтэм. Табере уг бурмы ни йӧнала. Всё равно ведь интыяз уг пукы, олокытӥ но кырӟаса, выступать карыса, юмшаса ветлэ. Озьы ик улоно!

Егит удмурт анайёс

А еще милям Манкизъёслэн пополнение! Кык манкилы трос луим ин!

Мон сыӵе шумпотӥсько Снежочек но Регинчик понна! Мамочкаос ни табере ведь! Уг но оскиськы мукет ласянь. Дышетским, улӥм, шузияським, дискотекаосы ветлӥм ӵош. И соку ми асьме понна гинэ кыл кутӥм. Табере озьы уз луы ни. Табере соос вӧзын луло пичи адямиос, кудъёс понна соос сюлмаськозы, уйзэс уз кӧлэ, ветталозы, яратозы! Со туж классно!

Ми тӥледыз туж яратӥськом, нылъёс! И зарни комочекъёстэс но тожо яратӥськом ини! Адӟеме потса уг быгатӥськы ни.

Туала фест

Пятницае "Туала фестэ" ветлӥм вал. Только вань мылкыдме, бертэм бере, общагаысь потоп быдтӥз. Соиз сярысь берло. 

Мон сыӵе пайми и ӝожоми, куке адӟи, кӧня адями лыктӥз концертэ. Ведь адямиос дасясько, дырзэс кужымзэс быдто. Ведь кинлы ке лэсьтӥсько со концертъёс. Адямиос сыӵе лэся компьютеръёссы, телевизоръёссы борды думиськылэмынэсь, лякиськылэмынэсь ин, лишний раз берпалзэс ӝутэмзы но уг поты ни. Удмуртъёс ӧжыт вал, кызьы выяснила сцена вылысен Света Ручкина. Бен оо, пятница ук, ваньзы доразы бертылэмынэсь. Мон эшшо раз аслым пусйи на, кыӵе удмурт позыръяськонъёслэн продуманной нуналзы шуыса-четверг.Уг тодӥськы, кӧня вал калык субботае, но, малпасько, трослы ик пятницалэсь пӧртэм ӧз луы.

Огъя мыным Туала фестлэн нырысетӥ люкетэз кельшиз. Тросэз, конечно, Silent woo goore группалы луыса. От души. Азьло неуверенногес ик выризы кадь, Света микрофон нуллӥсь но луылӥз, но сэре пумен-пумен ӧраз пыризы но "сутӥзы". От души.  Т.Галиханов кошкемен, конечно, группа трос ыштӥз. Вот со мыным ӧзгес тырмы. А как ведущий (нуисьёс вал Толя Галиханов но Наташа Ушакова) мыным ӧзгес кельшы-а мар-а, тросгес кадь вити солэсь. Бен мар-о, в своем стиле, но шуточкаосыз определенной адямиослы гинэ. Сцена вылысь, тем более филармония сцена вылысь "эти тела, сидящие в зале" нокызьы но уд шуы кадь. Тулкымъяськиз, луоз, антракт сярысь но вунэтӥз бере.

Модалиосты ми профессионалэн, с профессиональной точки зрения учким. Маиз ке кельшиз, маиз ке ӧз. Шаркан-трикотажлэсь, конечно, шокын. Мон уг быгатӥськы валэктыны, МА со сыӵе вал. 

Та дырозь ортчиз ни вал час но ӝыны, эшшо сэре Мордовиысь OYME группа потӥзы на. Соос, конечно, туж аспӧртэмлыкоесь, тунсыкоесь, но туж трос, перебор трос сцена вылын зулё. Ми 5-6 кырӟанзэс кылзӥм но кошким, бер вал ини.

И мар, бертӥм но, общагаын полный капец! Кухняын мойкаысь вуэ выллань тубе. Вань соседъёсты сайкатӥм, трубамы остатки прорватьтӥз на. Тазъёсын, ведраосын, тряпкаосын ваньмы бызьылӥськом! Купальникъёс гинэ дӥсяны уг тырмы на вал! Кобыен пол вылысь вуэм омыръям! Улысьтымы этажэз залили, конечно же. Кин ке бервыл вуэз октыса-октыса пӧсь вумы но ӧй вал, эшшо со тазикъёсын ик пыласьконо луиз на ву шунтыса! Вань мылкыд быриз, пыласьки но кӧлны выдӥ. 

Удмурт нылпиослы - удмурт мультфильмъёс!

Туннэ наконец-то "выбралась в свет", дискотека уг лыдъяськы. Ladi Sveti концертэ ветлӥм, #zemos_udmurt_veme  акцилы хоть кӧня ке ке но плюс карим, асьмелэсь ог люкетмес сётӥм.

Мыным туж кельшиз атмосфераез. Кыӵе ке дорын кадь. Тем 

более матъёс вылын пуким ми. Ужрад 0+ вал. Нылпиос тросаз. Кыӵе со умой, сыӵе дырысен ини анай-атайёсы та выллем ужрадъёсы нулло шуса! Пель сьӧрын чашетӥзы, шудӥзы ке  но соос, со вал кыӵе ке но символично. Света Ручкина удмурт мультфильм кылдытон понна ик лэсьтӥз ук вань та концертэз. Удмурт  нылпиос понна удмурт мультфильм.

Оскисько, Светалэн верам адямиосыз кутозы та эстафетаез но азьланьтозы сое. Медаз вунэтэ удмуртъёс асьсэлэсь умой сям-йылолъёссэс, ог-огзылы пунэм вылысь берыктытэк юрттыны быгатэмзэс.

Улон-вылон

Малы адямиос котьку асьсэлы рамкаос пуктылыса уло? Со даже не рамкаос. Шонер кыл али шедьтыны уг быгатӥськы. Малы мар ке каремед потэ ке, уг луы сое соку ик карыны? Малы кыӵе ке определенной датаез яке событиез витёно? 

Мынам маке йырам шукке ке, соку ик кадь сое лэсьтэме, быдэстэме потэ. А соку ик уг ке кариськы, ас понназ желание кысэ. Сыӵе ни адямиез. Близнецы, ма шуод. Ӝог ӝуатскисько, но, жаляса верано, озьы ик ӝог кыско. А эшшо со тылэз поддержать карисез ке ӧз луы на, эшшо мар ке умойтэмзэ веразы ке на, всё. Пиши пропало.

Ми сыӵе стереотипъёсын пачкатэм адямиос, что паллянэ-буре оглань вамыштӥд ке-ыбозы. Причём тыбырад. 

Син шорын

Сыӵе куазь шулдыр! Поръясал но поръясал ульча кузя. Вот Вася гуртаз бертӥз((((

Зато Люба дораз чортӥз, мертаськыны. Со мыным нош выль дэрем вуре. Нуллэм потэ ини! Трамвайысен дорозяз и обратно поръялски хоть, омырен шокай. Хотя берен кышкаса-кышкаса мынӥ, пеймыт ӝог кариське ни ук.

Трамвае пырыкум ик шорам чиньыен возьматӥсь луиз. Ньылетӥ классын дышетскись нылаш, только мынам группаям ӧвӧл. Мамаезлы сипыр-сипыр пеляз вераз мар ке. Школаысь училкамы шуиз по-любому.

Уг быгатӥськы дышыны нокызьы но. И весь паймисько, кызьы тодмо адямиос, кизилиос уло шуыса. Со сыӵе напрягает, куке тонэ ульчаын тодмало и эшшо чиньыен возьмато на. Ай соос ведь уг вато ай эмоциоссэс! Быдэс магазин, ульча, автобус-троллейбус-трамвай, кинотеатр, торговый центр, дугдылонни тыр кеськозы! И "здравствуйте" гинэ уз шуэ, "О, Лилия Николаевна! Здравствуйте!" одно ик.

Куаляк потӥсько. И малы ке но неудобно луэ. Школаын, значит, мон дэремъёсын, юбкаосын, каблук вылын ветлӥсько, а кытысь ке вне школы адӟо ке, мон за себя не отвечаю, ма вылам луэ) И кыӵе ке син азязы авторитетэ усе кадь потэ, шорам больше эш шоры кадь учкозы потэ. Соиз может и умой, но мынам аслам, дыр, дышетӥсьлэн образэз сыӵе рос-прос, дэремен, костюмен кышномурт син азям пуксе, а не кыӵе ке джинсыосын и кроссовкиосын, лэзьям йырсиен школьницалы тупась нылаш. 

Котьма мед луоз ин бен но, куалектӥсько ке но, умой но уг поты ке но, всё равно приятно.

Чимошур

Таяз выходнойёсы Пичи Пургала ветлӥм. Туж умой эшмы Лиана вордскем нуналзэ пусйиз.

Кемалась тазьы ӧй шутэтскылы! Душой. 

Эшъёссэ Лиана ӧтиз "Чимошур" шутэтскон базаязы. Туж шуныт атмосфераез вал. Нырысетӥ нуналаз ӟечкылам, арганэн Лианалэн картэз Миша шудӥз,удмурт кырӟанъёс кырӟам, шашлык тыл вылын пыжим. Пиос мунчое нимаз ветлӥзы, собере нылъёс. И ми кык пол(!) кезьыт вуэ, прудэ зымылыны потам! Мон татчыозь аслэсьтым в шоке! Висись адями нимаське, пе, кудӥз ялан нырзэ кыскаса ветлэ! Визьмо уд шуы. Зато кыӵе оказывается мышцаосты лябӟытэ, каньыл мугор луэ туж.

Эх, арганэ! Миша от души!

Шашлычникъёс

Мунчо бере, чай юыса пукон сямен, кыӵе ке но кышкыт учыръёс, вегинъёс, пӧртмаськонъёс сярысь вераськонъёс потӥзы. Лач-лач тылэз кысӥм ни вал, кылиз одӥг гинэ лампочка, соин корка пушкын ӝомалэс вал ни. Педлон тём-тём, кизилиос гинэ вылӥын пишто, толэзь но малы ке ӧй вал. Учыръёсты мадемъя, мадемъя пигон ик пештырскыны кутскылӥз! Причём, вань учыръёс асьмелэн улонысьтымы вал! Кыре потыны ик сэре кышкыт вал, ваньмы ӵош потоно луим. Ярам, уйин номыр сверхъестественноез ӧй вал.

Туннэ табань пыжим педлон гурын! Олокыӵе но! Сугонэн но, колбаса-помидор-сырен но, так гинэ но. Табань сиыны ноку но уз акыльты, малпай мон. Сыӵе со ческыт! ммм! Тодам ваисько но, дыльдые шыррр! вия. 

Маиз-о вань?

Табааань!

Самой главной пӧйшурась вуиз!

Самой,дыр, табань сием бере эктонъёсмы сюлмам кылизы! Удмурт тыпыртон но эктӥм. Лианалэн мамез пор бере, пор эктонъёсты но эктыны вырим. Сэре тямысэн эктон но эктэмъяським. Кыӵе разница, шонер-а эктӥм, ӧм-а, зато со вал от души, вань сюлмысь. Ваньзы жадизы кадь, но ваньзы вал шудоесь! Лианалэн ӟуч эшез но только так бордамы тыпыртӥз!


А эшшо ми ваньмы ӵош ӟечырам, а сэре ветлӥм валъёссы доры. Соос сыӵе мусоесь, общительноесь. Дорамы бызьыса ик лыктӥзы. Яратыны но лэзизы, сэлфи но пуктӥм.

Ути-пути, ме нянь

Малляны лэзиз, нянь понна)

Бордамы бинясько

Кышкай,куртчоз шуса

Сыӵе уг поты вал городэ лыктэм, куазез эшшо чеберлэсь но чебер вал!

ӟечыраськом!

Гуртын умой!

Вася пичи пинал дырзэ тодаз вае

Бадӟым тау кареме потэ Уарабейёслы, куное ӧтемзы понна! Ми тӥледыз яратӥськом!

Сюлэмен гожтэт

Одӥгаз классын группаям кык нылъёс вань. Одӥгезлэн фамилиез Карпова, нош мукетызлэн Черыгова! Мон аж синъёсме ик ӝутӥ вал, нырысь кылӥ но. И сыӵе мусо со фамилия кылӥське пиналъёслэн верамысьтызы. Ӧй на юа, удмурт сямен вала-а/ вераське-а шуса.

Пиналъёсы уд дугдо шумпоттыны. Туннэ нош сюрприз лэсьтӥзы! Сыӵе приятно! Урокын ик усьтыса лыдӟеме потэ вал ин но, возиськи. Сэре урок бере кабинетэ ӝог тубыса, пичи пинал кадь конвертсэ усьтӥ.

Дышетӥсьлы, дыр, самой вылӥ дунъет, куке пинал предметсэ яратэ и ассэ но дышетӥсез гажа. И нокыӵе аттестациос но, портфолиос но,  квалификациез ӝутонъёс  но соин артэ ик уг сыло!

Уйшорчи

Толон удмурт позыръяськон бере кыкетӥ часын уйин вуим. Машинамес укно уламы пуктӥм но, потыны ӧдъяськом вал ин...Шуак! куинетӥ этажысь, укноысь адямиез адӟи.

"Ма со каре?" -нырысетӥ юанэ вал. Тылыз комнатаяз ӝуа, уй тыл гинэ. Штораосыз кыскамын, нош ачиз укно вылын пуке. Йырсиосыз лэзьямын. Так и валаса ӧй быдты, кӧнягес арес ныллы-кышномуртлы. Оломар дауртыса пуке. Киоссэ выллань каре, сэзъя, ас котыртӥз берга. Машинаысь ик потыны кышкай мон. Пигонъёсы ик вылтырысьтым ӝутскизы! Мон ӧй быгаты валэктыны, ма со каре!

Вася нырысь машинаысь потӥз, сумказэ машина мышкысь кутоно вал. Так со кышномурт быдэс мугорыныз золтӥськиз, укно пияла бордаз лякиськиз и весь киосыныз шона! Бррр! Машинаысь потӥ но, шумприч, отчы учкылытэк, подъездэ пыри. Ладно хоть со милям этажамы ӧй вал! Точно оломар отчы луысал!

Вот, городын улӥськод, улӥськод, и уд но тодӥськы, кин тонэныд артэ, борддор сьӧрын улэ.

Удмурт позыръяськонъёс. 7-тӥ сезон

Кема ик кадь витим удмурт дискотекаослэсь 7-тӥ сэзон кутскемзэ. Золгес но,дыр, "Резиденциын" ортчозы ни шуса тодэм бере. Контактын вал трос информация та дискотека сярысь. Ну и, конечно, мон  но, эшъёсы но ӧм быгатэ кельтыны таӵе событиез. 

Вуим ми дас бере ни, машинамес ДК Металлурглэн урдэсаз кельтӥм. И сразу суред: куинь пиос сур юса сыло. Удмуртъёс, - шуиз Вася. Озьы ик вылэм.

Пырем берамы паймим, калыкез тросаз. Черод бен туж кема уг сылы, ӝог лэзё. Кыӵе мон шумпотӥ, куке тодмо охранникез адӟи! Уг тодкы малы сокем, но куинь ар куспын родной а мара луиз ини. 

Паськыт кузь падӟа вылтӥ тубыса, клубаз пырим. Син мальдӥз! Чебер! Соку ик кыкетӥ этажаз тубыса котырским, вань тодмоосын ӟечьяським, ӟыгыръяським. Сомында интыез!-пусйи ас поннам. Пепелын кадь ӧвӧл...Кыӵе мон пайми, куке выльысь уллань васькыса, черодэз адӟи! Чуть ли педло потэмын ӧвӧл!!! Неужели ваньзэ лэзёзы еще ас поннам малпай на, клуб бадӟым но, резиновый ӧвӧл ук!...Вылэм резиновый лэся.

Мыным яраз Богдан. Вообше фанат луэмын кадь али мон Богданлэн. Мыным яраз бадӟым экран вылын видеоряд. Арт-экспедиция. Сыӵе самобытно, зэмос улонысь, удмуртъёслэн улонысьтызы. Без пафоса и показухи. Еще кельшиз Богданлэн Олеся Дыдыкаен кырӟамзы. Вужез но вылез огазьын. И мыным вообще яра Юмшанлэн "Вужзэ гажаса- выльзэ малпаса!" дэвизэз. Вужзэ тодытэк, вылез но ляб луоз. Нош выльзэ малпатэк, азьпала азинскон уз луы.

Только мон паймигес, кыӵе ымныръёсын кылзӥзы удмуртъёс " Мы суперудмурты" кырӟанэз. Мыным та кырӟан туж мылкыдэз ӝутӥсь, патриотичной даже потэ вал. Нош мон ӧй шӧды сыӵе мылкыдэз адямиослэсь, жаляса верано. Эшшо малпай на, бигеръёс яке мукет тюрк выжыысь калыкъёс оломар дауртыса тэтчасалзы ни, дыр, шуса. Уг тодкы.

Всё, та сяна, мыным больше номыриз ӧз кельшы. Любовь Быкова монэ не впечатлила. Сцена вылын тросес ӟуч сямен вераське, удмурт сямен вераськыны выре гинэ.

Калык пыре но пыре, эктыны интыез ӧвӧл,"руки по швам и экты"нимаське. А эшшо калык отчы-татчы ветлэмысь ӧз дугдылэ. Ай ведь тон мынӥськод ке, умой мын вал но, нет, ведь донгыса,ӵыжса,шуккыса кошкозы. Извиниться кариськон сярысь уг но вераськы ни. 

Вылӥ этажысь перилаос вылэ адямиос някырскылэмын, улӥысь эктӥсьёсты учкыса уло. Как то туж ик приятно ӧвӧл.

Сомында калык, эшшо ӵын лэзизы на. Шоканэ ик пытсаське вал ин! Клаустрофобъёслы отын номыр карыны. Кема ӧм чидалэ. Часозь улӥм и вань эшъёсынымы кошким.

Оломар со вал. Мон валаса ӧй вутты. Мон вити та дискотекаез, малпай, ву улэ зымыса, чебер дуннезэ адӟо шуса. А пӧрмиз, йырез вуэ донгам кадь гинэ, и то шокан пытсаськыса, воньдыса.

Да, удмурт дискотека уже мукет ини. Только кыӵе со мукет, мон шугъяськисько на вераны. Мукет позыръяськонъёс возьматозы.Дыр.

Мискинь пиналъёс

Гань-гань бертӥ туннэ ужысь. Шунды пиштэ, ымнырме маялтэ, сьӧд пилемъёс кытӥ ке кыдёкетӥ бергало, лек тӧл но сыӵе зол котырам ӧз мерскы. Зато ӵукна уже мыныку пельёсме кынтӥ. Вить минут пала дыр шунтыса пуки сэре, йыры кыклы пилиськоз ни малпай вал, кызьы урокъёсме нуом шуса кышкай вал. А уроке трос но ӧжыт но ӧвӧл-тямыс гинэ.

Урокъёсы-а вылысьтыз вылаз мыно шуса( шутэтскыны уг вуиськы), адямиос-а ваньзы ас понназы шуса, номыр но кулэ ӧвӧл соослы шуыса, туж ик комфортной условиосы-а ужаны ӧвӧл шуса, шӧдыны кутски пушкысьтым кыӵе ке но негативез. Лек потыны кутски аслым. Пиналъёсы жалесь. Как маке не то каро ке, асме кутыны уг быгатӥськы, зол куараен кеськисько. Бен нош ик малпаса, умой верамез соос пелязы но уг басьто. Дышемынэсь лэся, ваньзы соосын озьы верасько шуса. Тужгес ик со семьяысь потэ. Тросэзлэн анай-атайёсы пиналъёсынызы кесяськыса верасько, соответственно, дышетӥсьлэсь спокойной куараен верамез соос воспринимать уг каро. И, потэ-а тынад уг-а, приходится куараез поттыны. А ведь золгес вераськод ке ин, соос туж ӝог кыло, и лэсьто сое, ма кулэ дышетӥсьлы.

Даже общагаын улса, адӟиськод, кызьы со пиналъёс будо, кыӵе соослэн воспитанизы. Борддор сьӧрын кыӵе ке семья улэ. Папазэс гинэ бен адӟеме вань ымнырысь ымныре, кудӥзлэн котькуд одӥг кадь кудӟем состояниез. Так соос что дас кыкен уйин, что вить часын ӵукна даллашыса, йыгыр-дымбыр поттыса, мать карса быдэс комнатазы тыр уло, а пиналзы чирр кесяськыса бӧрдэ! Мон так и ӧй вала ни, кӧня аресъем со пиналзы, и кӧня вообще отын пинал. Но куке папазы кесяське "Да заткнись ты уже!" шуса, и пиналзы "не надо! не надо!" шуса нош чир бӧрдэ, ну уг чида мынам сюлмы! Ну кыӵе со пинал бӧрысь луоз?!Кыӵе со гражданин луоз?! Сыӵе семьяослы вообще пинал вайыны ик лэзёно ӧвӧл,дыр. Коньдоно муртъёс одӥгзэ но пиналэз кышкало будэтыны, пыд вылаз пуктыны, коньдонзы уз окмы шуса, а бускельёсы кадь семьяос ик куинь-ньыль вылысьтыз вылаз вайё, маткапитал ук, коньдон кулэ. Да блин! Ма со 400 сюрс! Со же номыр, по сравнению мар нылпилы азьланяз сётыны кулэ тон, КӦНЯ сётыны кулэ тон. Да соос уг но малпало сое кадь, пиналъёссы соослы кулэ ик ӧвӧл. Сюлмы ик путыр пилиськыса кошке, куке пиналъёсы дорам лыкто и шуо: "а у меня мама опять сегодня пьяная", или бӧрдыны кутско "мама с утра до ночи на работе, а я одна". Ну мар мон каром?! Мар? И сыӵе пиналъёс туж трос!

И нош ӧй чида, и соцпедагогмылы верай бускельёсы сярысь. Йырыныз шона, инспекторлы верано, пе. Мынам туж уг поты, пиналлэн анай-атайёсызлэсь правозэс мед басьтозы шуса. Ну мед хоть инспекторъёс асьсэдысты анай-атайёсты воспитать карозы, медам ни мон кылы сюлэмез вандӥсь кесяськемъёсты борддор сьӧрысьтым и вообще но!

Нуныямын

Ура! Ноутбуке куке соку берытскиз дорам! Уни-муни кури ни мон сое мӧзми!

Секыт, секыт таиз дышетскон ар кутске. Кылем арын даже капчигес вал, одӥг капля синвуме но даже ӧй кисьты. Нош таяз арын мар но ӧй вал ни! Кытчы но мон вляпаться уг вуиськы! И ваньзэ туж матэ басьтӥсько лэся сюлэм бордам. Уйин куке приёмный покое но ветлоно луиз ин, ладно укол пуктӥзы но лэзизы.

Нуныямын ни, воксё нуныямын. Гуртэ автобусэн но даже бертэме уг поты, лучше кык час возьмало но гань-гань машинаен берто. Прынцэсса.

Завучмы субботэ 4 урок пуктӥз, зато пятницае методдень луоз, пе ( урокъёс ӧвӧл). Ми, конечно, ӵош ужасеным востэм удмуртъёс, я а мар-а ни шуса кошким нырысетӥ нуналаз. Хотя мыным туж сюлмыя ӧвӧл сыӵе расписание! Мар со? Гуртэ но бертылыса уд вутты, шутэтскын но тыро-быдо уд шутэтскы. Туннэ мынӥм но верам, дышетӥсьёс но ваньзы не в восторге. Сэре нош малпасько но, мукет школаосын (гурт школаосын кылсярысь) субботае ужало ук! Но, нош ик, соос берто но, соку ик доразы вуо. А мыным озьы секыт, котькуд выходное бертӥсько бере. Нуныямын.

Мамалы вераськемъёсме мадисько ке, пичи пинал шуэ монэ. Алигес кытысь ке лыдӟи, нылкышно ассэ пичи пинал кадь возе ке пе, со шудо! Шара лыдӟи даже. Определенно нуныямын.

Мылкыд

Секыт мылкыд. Родительской собрание вал. Анай-атайёсын ужаны котьку но секыт. Ну ладно, прорвёмся! Танки грязи не боятся шуком вал пичи дыръямы! 

Зато пиналъёсы туннэ шумпоттӥзы. Куинетӥ классын урок бере нылъёс дорам вуизы но иворъёссэс мадё. Нош огез востэм гинэ сылэ. Мар шуисько тынад? И мыным таӵе записка мыче

И мынам мылкыды ӝутскиз! Сыӵе приятно, куке тонэ кин ке но гажа, даже больше- яратэ. И нош но нош ужам потэ.

Ӵошкытысь гожтэт

Нырысетӥ нуналаз ик 7 урок пуктӥзы. Толон ӝытазе ик ньылонэ висьны кутскиз, пель пушъёсы ик лыдо вал. Ӵукна но висись ньылонэн султӥ. Всё, малпай, капец, кызьы урокъёсме нуом на.

Нуи лэся. Вунэтӥ ньылонэ сярысь но, висьыны но дугдӥз кадь. Кыкетӥ классъёсын тодматски. Мон валай, кыӵе ке дышетӥсь, пиналъёссы но сыӵеесь шуса. Куинетӥ но ньылетӥ классэн туж бурно урокъёс ортчизы. Мӧзмиллям-а, оломар-а, но возбужденноесь туж вал, еле как интыязы пуктылӥ, борддор сьӧрын мкш пуке завуч.

А, нылаше лыктӥз! Сыӵе шумпотӥ! А эшшо ке монэ тодэ на вылэм. Удмурт. Кукмор ёросысь. Перепечкинын ужам. Вообще музъем туж питрес. Хоть удмурт юлтош шедиз ай мыным. Вообще хоть кыӵе ке но юлтош.

Доре бертса тууууж приятный сюрприз возьма монэ вылэм! Вася туннэ вуиз, и Бодьялась кузьым ваем. Вот, мама котьку шуэ, бӧрдӥсьтэм пиналлы ымаз ноны уг сёто шуса. Шундыкар нылылы шуи вал, вот мыным номыр на память ӧд но кузьма шуса. Ыстӥз ведь гожтэт. Кекоранэ)))) Васялэн мамасыз дото паймиллям.)
 Тау бадӟым, Санёке! Табере вань улонэлы синпелетэд кылёз ин! Мон вань сыӵе штучкаосты коробкаосын возько. Эшшо газетэ гожтэм Шундыкар сярысь! ӟечок! Табере мынам но нимы бодья газетын потӥз ин.

Шузи

Визьмо, конечно, монэ уд шуы...

Августэ гуртысь городэ вуэм бере шуккем кадь ветлӥ. Суйёс мырдэм ӝутско, пыдёс гыж-кал азьпала вамышто.  Уг поты городын вообще улэме. Секытэн дышыны выри нош, ӧй бен дышы на. Огнам. Васяе гуртаз. 

А эшшо косметический салонэ шеди на. Бесплатной, видите ли, спа-процедурае. Ымныры толалтэысен умой ӧвӧл. Малпасько ветло ай, лэсьтозы дунтэк, шутэстко хоть, товарзэс донгыны кутскизы ке, тау шуо но кошко.

Не тут то было. Мон оказывается сыӵе ведомый адями, уговорить карыны монэ ничё не стоит. Ужас! Мон басьтӥ со косметиказэс! Дуныз 54 сюрс!!! Рассрочкаен конечно. Нырысетӥ взнос 10 сюрс сётӥ. И мон туж уверена вал, шонер лэсьтӥ шуса. Ма монэным луиз, уг  тодкы! Мон отчетливо адӟисько вал, адями, кудӥз ужаз монэным, вань кылъёссэ на зубок дышетыса вера шуыса, вань приёмчикъёссэ адӟи, мон доры доверие пырыны турттэмзэ. Но мон татчыозь уг быгатӥськы валэктыны аслым, ма монэным луиз. Вань эшъёсы мынэсьтым в шоке, тросгес ачим.

Ӝыт бертыса мон эшшо зырай на ымнырме со "уникальной" косметикен. Собере интернэтэ пыри но....! монэ затрясло. Вань мугортӥм пӧсь тулкым азьло кошкиз, собере пушкам кезьыт луиз кадь, и ваньмыз пыдам кошкиз. Йыры пуштыны дась вал ни. Йырын одӥг юан: ма мон кари??? Собере: Ма каром табере???

Малпаськоннам умме но усьыны уг быгаткы вал, собере мукетыз сярысь малпаны кутски но, секыт малпанэ пыдысьтым йырам тубыса, темечкоетӥм потӥз. Зэм, мон сое даже физически шӧдӥ.

Сояз нуналаз сайкаса нош одӥг юан. Ма каром??? Школае мынӥ, дышетӥселы шуко озьы озьы шузи, вляпалась. Ой, шуэ, тон ма?! Лиляяяя?!!!

Бызьыса ик кожной больницэ шонтӥ, совещание ик ӧй мыны. Ещё трамвайёс ӧч карем кадь ӧй вал, дерматолог дорын кык час палан черод витьыса пуки на. Бордам пукись адямиос акыльтӥзы,дыр, мынэсьтым, что за неспокойной кышномурт шуса. Оглань-талань ветлыны кутски вал ин мкш. 

Я, куке соку мынам но черодэ вуиз. И мыным сыӵе удалтӥз! Вераса но проблемаме ӧй быдты, монэ сразу валазы. Сразу справка гожтӥзы, лечение назначить каризы. Аптекае пырай сэре но, 700 манетлы аж. Контактная аллергия, пе. Мон сыӵе тау соослы вал! Мыныса доразы шоколадэн хоть тау кароно луоз. 

Интернетысь кытысь учкыса, гожъяй ай мон претензия. Добровольно ӧз ке, пе, берыктэ, претензия сётоно, пе, в письменном виде. Кык экземплярен эшшо поттӥ на мон сое.

Мынӥ туж бадӟым пакетэным мон отчы берен. 1 сентябре со вал. Праздник блин, малпасько. Ӧз лэзе. Кулэ пе заранее юристсы доры гожтӥськыны. Табере юристсы доры уг быгатӥськы дозвониться. Кысэмын трубкез. Нош сюлмаськын кутски.

Туннэ кутӥз. Туж приятный нылкышно куара. Дото умой вераськиз, пумиськонэ гожтӥз монэ.
Отчы мынса но, монэным туж умой вераськиз, пакетме кутӥз, вань документъёсты лэсьтӥз и ялан мыняз мыным. Мон ӧйгес дась вал сыӵе приёмлы. Даллашыныгес мынко вал. Но ваньмыз туж капчиен ортчиз. Договормес пытсазы, коньдонме карточкаям возврат каризы. Табере арня куспын витё ин, ку кровный коньдонэ дорам берытскоз.

Мынам вообще туж бадӟым тау шуэме потэ эшъёсылы, кудъёсыз таӵе учырэ вал вӧзам и кудъёсыз морально монэ поддержать каризы. Особенно Таня Стрелковалы! Музъемозь йыбырттӥсько!!! Эшшо раз валай, КЫӴЕ мынам эшъёсы шуса!

Нылъёс! и пиос но! Дунтэк сыр ловушкаын гинэ луэ! Да мед луоз йырвизьды котьку бордады! 

1 куарусён

Кыкетӥ ар школае мынӥсько ни дышетӥсь луыса. Таиз арын, конечно, чылкак мукет шӧдонъёсы вал ин.

Кыкетӥ классысь удмурт кылэз дышетӥсь пиналъёсы сыӵе мусо, сыӵе родноесь потӥзы. Гужем куспын туж ик ӧвӧл воштӥськиллям кадь. 

Школа азьын куинь линейка ортче, мкш сюрслэсь трос нылпи, ваньзэсты тэрытыны возможность ӧвӧл. Пиналъёс но дышетӥсьес но ваньзы сямен чебересь, ваньзы пальпото, пумиськемлы шумпото.

Кылем арын сяська ӧз палды мыным. Нош туэ быдэс ӟыгыртэт. Сыӵе приятно! Кудъёсыз кык сяська керттэтэн но лыктэмын: дышетӥсьсылы и мыным.

Сыӵе тыркушаос. Час но ӧз чидалэ умой-умой пукыны) Дото мусоесь бен.

Кыкез дышетскисьмы кошкиз. Табере ми 25 кузя. Таяз арын нылъёсмы крезен шудыны кутскын кулэ. Туж яраз реакцизы, куке соослы веразы крезен шудозы шуса. Ваньзылэн мылкыдзы лӧптӥз. Нош огез нылаш гужем кытын ке концерт пуктэм и кырӟам удмурт кырӟанъёсты! Мон вообще-то пайми туж! И эшшо раз малпай токма уг ужаськы шуса!

Мар возьматоз таиз ар - адӟом!

Нош туннэ- ваньзэсты праздникен!

Капчи мылкыд но кылзӥськись, ӟеч нылпиос, дышетӥсьёс!

Нош дышетскисьёслы - валась но чидась дышетӥсьёс но дышетскыны мылкыд!