Ооо! Куке соку вуи компьютер сьӧры но!

26-27 июле ветлӥм "Юр-яр" турслётэ. Ми сборной команда люкамы вал. Шаркан, Пурга но Як-Бодья ёросъёсысь адямиосмы вал. Ваньмы бен туж умой эшъёс. Ваньмыз ӵош 10 адями гинэ.

Турслётэ кык нунал кылиз вал,кыкез пиосмы веразы, уз быгатэ мыныны шуыса. Ой,ма со вал. Кинэ гинэ ӧм утчалэ, кинэ гинэ ӧм чортэ! Ваньмыз отказались. Туж деловоесь адямиос вылӥллям. Ми гинэ бездельникъёс шуыса асьме понна малпам. Ладно хоть Титова берпуметӥ нуналаз уйин ин почти шедьтӥз пияшез. Ӧй ке шедьтысал...вань дасяськеммы токма лусал.

Туж умой бен пияш шедьтэм Таня. Миша Широбоков. Палатка но пуктыны вала, пӧртэм герӟетъёсты но тодэ, бызьылыны быгатэ, гитараен-арганэн шудэ, эшшо кырӟа. Видимо, пиосты утчаса вань курадӟемъёсмы понна сыӵе шедиз))

Командамес "Кукейёс" нимам. Курегмылы туж классный дӥсь шедьтӥ, кукейчикъёслы балахончикъёс вури. Умой кадь визиткамы пӧрмиз, Титова бен ваньзэ ма кулэ классно лэсьтӥз-вераз.

Нырысетӥ нуналаз ортчизы визитка, сэре командамы бызьылыны кошкиз(со азьпалан час но ӝыны черодзэс витизы ай, мкш дасэтӥесь потӥзы), сэре бивуакъёсты но дасям сиёнъёсмес учкизы. Ми в тему курег лэсьтӥм. Азьло филезэ шеф повармы Лиана молотокен коказ, сэре вылаз сыр, помидор, ческыт перец понӥм, сэре сое рулетэз кадь биним но, фольгаен бинялтӥм. Барбекюшницае поныса, тылскем вылын пыжим. Туж ческыт курегмы пӧрмиз! Нырысетӥ инты сётӥзы.

Озьы ик кырӟанъёсын ӵошатскон ӝытаз ортчытӥськиз на. Кырӟанмылэн чылкак мукет мотивез луыны кулэ вал. Миша шуиз, нудно пе. И ӝог-ӝог, сценае потон азьын ми сое воштӥм. Туж тодмо удмурт частушкаосты ГО группалэн мотивезъя кырӟам. Тунсыко пӧрмиз кадь но, ачим видеоысь учкыны уг быгатӥсы, возьыт.

Бер-бер ӝыт дискотека мынӥз на. Нырысетӥ нуналлэн пумаз ми ваньмызлэсь азьпалан мынӥськом вал.Бен Шарканлэн командаез одӥг очколы гинэ келя вал.

Тылскем азьын пуким на гитараен шудса-кырӟаса. Только малы ке ваньзы туж ӝог палаткаосазы кӧлны кошкизы. Пересьмиськом, лэся.

Кемалась палаткаын кӧлэм вал ин. Пыдъёс кынмизы. Титова субботэ шуэ вал, котькуд ар ветлом шуса. Сояз нуналаз султӥз но, весь чонгырамын, больше уг ни ветлы шуса вераз)

Кыкетӥ нуналаз футбол но перетягивание каната ялэмын вал. Туж кема кускыны выризы! Футболэн шудыны нош пимы ӧй вал! Мишамы ӝытаз кошкиз, и ӧз ни вуы. И нокинэ но шедьтыны нош ум быгатӥське собыдӟа районысь! Куке соку шедьтӥзы Андрейлэсь эшсэ. Мишаез замена карим.

Футболэн шудыкузы, командамы туж жаль потӥз. Малы ке шуоно, мукет командаосын калыксы трос вал, и дугдылытэк вошъяськыса улӥзы. А милям, мискиньёс, ваньзэ асьсэос, вошъяськытэк, шудӥзы. Да еще мукет командаослэн шипованой кроссовкиоссы вал. Мыным потэ, заменаын определенной количество адямиос луыны кулэ, а озьы олокӧня пол но вошъяськыны луэ ук. А кудъёсызлэн командаслэн вообще профессиональной футболистъёс шудӥзы, кудъёсыз нырысетӥ нуналаз даже ой но вал. Со тоже туж умой ӧвӧл. Тем более положениын гожтэмын вал.

Мыным туж яраз удмурт турслётэ ветлыны, тем более сыӵе компаниен, кудӥз вал милям! Ӧвӧл куштӥськоно сыӵе классный малпанлэсь, но котькуд ар пумиськылоно пӧртэм ёросъёсын! Ми кыкетӥ инты басьтӥм! Шаркан командалы одӥг баллы келяса. Туж умой кузьымъёс басьтӥм, табере сояз арын одно ик мыноно луоз ни!

P.S. Фотоос может бӧрысь луозы. Интернеттэк гуртын вообще шузи луисько ни.

Сюан.2 нунал

Кыкетӥ нуналаз удмурт сюан луоз шуса верамын вал. Удмурт дӥсен одно ик лыктоно шуэмын вал. Мама шуэ, что за мода, пе, пошла! А мыным яра. Бен со тоже шумпотэ гинэ, так гинэ вераське.

Дасяським Васеным, дӥсяським но мынӥм.

Пересьёс кемалась дасяськизы вал ин, репетициосы ветлӥзы. Элябаба пыр ма но со тодӥсько вал.

Кема люкаськыны вырим! Кема кӧлӥллям кин ке–кин ке!

Удмурт сюан пересьёслэн пукон корказы ортчиз, азьло отын библиотека вал. Сое нимысьтыз чеберъязы но сайдинген сюан азьын, спонсорской юрттэт)

Пересьёс кырӟаса-вераса пумитазы милемыз. Корка пырыкумы ик котырскыны шуса, туж трос калык пыриз. Соку ик ма карыны ёрмизы кадь. Кызь но озь но бен котырскиз корка пушкытӥ.

«Тӧдьы кызьпу вож куаро но…» сюан голос. О, тодмай, кырӟасько. Эшъёсы паймизы лэся. А мыным со кырӟан сыӵе яра.

Котырскыса, егитъёслэн анай-атайёссылы йыбырттӥм, кудъёсыз горд сэрег улын пуко вал.

Коркалэн тӧрооосыз–Добряковъёс, Дималэн кирос мама-папез. Соос куно пумитало.

Сектаськын кутскизы.  Ухват сюр вылъёсысь рюмкаен варсен вина удо. Элябаба сектаське. Уг юы ук мон солэсь, умой ӧвӧл. Сектаськизы маразы, эктӥзы-кырӟазы, гур дурын табань пыжон дыр вуиз. Только выль кен табапудэз кутылэм гинэ, ӧвӧл пыжем. Ӵын но маке  сэре луиз коркаын. Мон берло гинэ тодӥ ин, Мишаен Валераен липет вылэ тубаса мурыез пытсаллям шуса. Чупыресэсь ук!

Куро пыртон дыр но вуиз. Куроез пол вылтӥ куязы. Зиналы кияз ӵужон сётӥзы. Коньдон куяло, курозэ пазяло. Нылъёслы шуко, октэ, мар сылкоды! И кутскиз! Ми коньдон октӥськом, бадӟымъёс люкето. Ма мар бадӟымъёс! Егит пиосъёс но! Кырӟаськом, октӥськом, куро вылтӥ эктӥськом, пазяськом!

Соку ик ыжпиез пыртӥзы. Тӧдь-тӧдьы мусо быле. Со, пе, винаен сектано на вылэм. Юиз ке–выль карт юись луоз, уз ке–уз.

Озьы выроннамы «пинал» бӧрдны кутскиз. А-а-а зар-зар бӧрдэ. Сое буйгатон понна дӥсь-а, коньдон-а дӥсьлы сётоно,пе. Я, сётӥзы. Бордэмысь дугдӥз лэся пиналзы.

Коркаын пӧсь, шоканы ик номырин. Мон шортдэремен. Вылтӥм ву вия. Трос пол потай педло, троссэ ик кельтӥ вылды адӟытэк(

Собере ваньмы дасяськыны кутским ву дуре. Шур дуре васькон азьпалан ваньзы дӥсьсэс воштӥзы. Оломар но маскара дӥсьёсты золтӥзы вылазы.Сьӧд сьӧсь кужымъёс медаз калъяське шуса лэся.

Дималэн ӟуч эшезлы туж яраз лэся удмурт сюан. Азьло со куриз удмурт воргоронлэсь дӥськутсэ. Сэре сарафанэн но кышетэн ветлэ вал ин. Туж тунсыко.

Мар кутскиз шур дурын! Туж жаль, куазь кезьытгес вал шуса. Озьы шуре но,дыр, кин ке кин ке лобасал. Ваньзэ фотоосысь адӟыны луэ.

Берен тубеммы бере, Зина ӝокез куинь пол котыръяса ӝоккышетъёс вальылӥз. Ӝоксы тыр мед луоз, тамында ик куноос люканы мед быгатозы.

Таин удмурт люкетэз быриз. Нош мынӥм кафее. Удмурт дӥсьёсын ик. Котькытын-котькытын удмурт костюменым ветлӥ вал ин. А Порозам ӧй вал. И кафеын но удмурт дэремен пукеме ӧй вал.

Ух нош отжигали ми отын! Эктӥм ук, эктӥм ук! Вань калыкез паймытӥм кадь.

Ньыль часын ваньмы по домам бертылӥм, укмыслы нош кафее ӧтизы. Табере,пе, пытсам пати луоз егитъёсын.

Туж  классный нылъёс-пиос люкаськизы. Надя Наговицына –Баба Просто– ваньзэсты пукон вылъёсысьтызы палдытӥз! Серекъяса кӧт висе вал ин. Огреч оломабыдӟа кузьмаз, чтобы кушали только)

Та компаниен но туж шулдыр пукысалмы. Малы ке Димаен Зинаен ӧтиллям на Воткинскысь диджеез но ведущиез, кудъёсыз чик но не вписались отчы. Музыказы но вал клубняк гинэ. А ваньзылэн потэ вал асьмелэсьсэ,удмуртсэ.

Соос часын программазэс быдтӥзы. Костя Никитин пульт сьӧрын ни вал, динамикысь Котельников кырӟа, микрофонъёс пумен Бегеш но Лара киын! Профессионалъёс, ма шуод на! Вот соку зол затусили!

А, презентацимес возьматӥм-таки!Ваньзы серекъязы, яраз лэся!

Да уж, кык нунал тазьы сюанын калгем ӧй вал на! Жадиськиз! Кык нунал отходила на. А Димаен Зинаен ӧвӧл но жадиллям лэся. Ӟечокъёс! Эшшо раз сӥзисько трос аръёс ӵоже ӵошен ог-огдэс валаса, яратыса, оскыса улон. Трос мусо, визьмо, ас кадяды ик, пиналъёс!Ураааааа!

Сюан. 1 нунал

Софрончикпорозмафипатименмы кышно вайиз. Татчыозь огшоры улон ӧре пырыны выри. Кык нунал калгим! Сюан ке сюан!

Сюан 11-12 июле ортчиз. Ми Васяен четверге ик Ижевске мынӥм, мкш выкупсы Ижевскын вал. Ачиз Зина Глазов палась ке но. Матынгес.

Султӥ мон сюан нуналазы 6 часын ӵукна ик. Малы ке шуоно, нош ик прическаос кароно вал нылъёслы. Дыши ин кадь, котькуд сюан озьы ортче…Выкупозь ик жади вал ни, бен, собере ӝог жадеме быриз.

Квартиразы 9 этажын. Выкупез туж тунсыко потӥз. Вань укмыс этажзэ ик тубим ведь! Выкупсэ тамадаоссы ик дасяллям: Лёша Бегешев но Лара Мамаева. Бестселлер дуре библиотекае вуиськеммы.

Чебересь! Вуэммы бере репетиция карим, туж зол «Горько!» кесяськыса. Нырысьсэ Софрончиклэн квартираяз сыӵе зол кесяськын лэзизы)))

Егитъёсмы Иж кузя туспуктэмъяськыса ветлыкузы, ми соосты утчаса ветлӥм, Лёшалэн но Ларалэн дасям квестсыя. Мӧзмыса ӧм улэ.

Ижысь Воткинске мынӥм. Воткинскын вите ни вылэм соосты тӧдьы лимузин. Кин ке шуоз уау! Нош мыным номыр кадь ик ӧй вал. Ми сяська утчаны кошким Воткинск кузя, а нылъёс лимузинэн Шарканозь бертӥллям.

Куазь туж вошъяськись вал. То зоре, то шунды потэ, тӧлыз кезьыт.Бен, зор шудлы шуо. Озьы медло.

Мыным Шарканын ЗАГС тужгес но яра ваньмыз пӧлысь. А таиз регистрация эшшо но чебергес а мар-а вал. Гоша нуиз, только кылъёссэ лыдӟиз, соиз особо умой ӧз адскы…Вова Иванов кырӟаз, чебер туж кырӟаз.

Июне сюанэ ветлыкум, юай вал, удмурт кылын регистрация каро-а шуса. Юалляны, пе, юаллязы вал ин, текст но дасямын ин, пе, а нуыны ӧвӧл на нуылӥллям. Вот ми,дыр, сюанамы не «Да!» шуом, а «Оо!»)))

ЗАГСын верам кылъёс котьку лултыр сӥосме дэмӟытыло. Тани-тани зар-зар бӧрдо ни кадь.Кызьы жених но невеста возисько сыӵе дыръя?

Регистрация бере сизьыметӥ выж вылэ мынӥм на. Азьло дыръя машинаос сыӵе шузимыса уг ветло вал. Кышкыт даже сылыны но, не то что дугдытъяны. Дикойёс! Одӥгез даже эн кураське, пе! Я таре, туэ озьы лэся сое шуо ин.

Сюрес вылын жадиськиз. Ӝоггес потэ вал ин кафее, шуныт интые. Егитъёсмы выж бере эшшо кытчы ке мынӥзы на. Ми соосыз час пала витим. И гурт калык но. Администрация вӧзы люкаськемын вал калык. Лимузинэз адӟыны вуизы вылды.

Ӝытэз Лёшаен Лараен ик нуизы. Шулдыр, котьку бен шулдыр, ачид ке шулдыръяськиськод. Миляи ӝокмы самой компанейской вал. «Тарталетки». Активноесь, зол куараоесь, шулдыръяськыны, эктыны-кырӟаны быгатӥсесь.

Ӟечкыланэн, конечно, порозмафи нылъёс обложались. Конечно, Вовчиксы кинул но. Дасям вал презентация, проектор ӧз ӝуатскы(( Зато одноклассникъёс-эшъёс сыӵе шулдыр эктӥзы-кырӟазы. Туж неудобный момент вал, мон понна лично.

Фейерверк но вал. Эшшо туж яраз Дималэн но Зиналэн эктэмзы!

До победного конца эктӥм егитъёсын. Уг вунэты: «Рюмка водки на столе»…та кырӟан та сюанэн ассоциироваться кариськоз ни.

Азьпалан эшшо одӥг нунал…!