четверг, 18 декабря 2014 г.

Удмурт вузаськись

Ура! Ура! Куке но соку аслым выль удмурт дэремлы басма басьтӥ! Дэра дэреме сыӵе но жаль потэ. Секыт но со, пӧсь но соин. Нош кроез туж яра, сыӵе ик вурыны кури.

Любаен басма утчаса центрысь вань магазинъёстӥ ортчим. Любалэн со огшоры маршрут, нош мон жадисько озьы ветлыны. Туж трос ваньмыз. Син азьын ваньмыз пиштэ, ворекъя, чиля. Бырйыны ик секыт. Одӥг басма яра ке ведь, мукет азьысь учконо на ай. Котьку милям озьы луэ: нырысетӥ магазинысь мае ке шедьтӥськом, сэре ваньзэ-ваньзэ ортчисько, пумаз нош отчы ик вуиськом.

Таяз ветлыкумы эшшо но тросгес ортчим. Почти берпуметӥяз пырим ни вал. Удмурт кышномурт-басьяськись телефон пыр кызьы ма вурыны шуыса вераське. Тунсыко. Кытысь ке Пурга палась: ы-ы шуэ.

Мынӥм мукетаз, кыдёкын ик ӧвӧл. Люба удмурт кылын телефон пыр вераське, мон тесьма учкисько.

- Мар-о, нылъёс, бырйиды-а?

Синъёсы ик кымесам тубизы, куаретыны ик соку ик ӧй быгаты паймоннам.

- Ӧм... Нош кыӵе приятно, куке удмурт кылын куарето!
- Ма кызьы приятно уз луы, ас кылын куаретозы ке! Куаретӥсько тани!
-Бигерысь-а Тӥ,- соку ик валатски вераськемысьтыз.
-Учкы ай, кытысьме но тодӥзы.
- "Вераськиськом удмурт кылын" наклейка ляке. Кылэмды вань-а сыӵе акция сырысь?
-Ӧвӧл...

Дэреме дась луиз ке, тесьма басьтын отчы мыно!

Дуно улон

Арнязэ шуккем кадь ветлӥсько ин. Будто ке мон-со не мон. Ульча кузя мынӥсько но, киноын кадь, ваньзы кытчы ке дырто-дырто, бызё, нош мон пыдъёсме мырдэм, гыж-кал кыскаса вамышъясько. Пельёсам ӵоксэтъёс кадь донгамын, ваньмыз бус пыр кадь, укно пияла пушкын кадь...Сайкамын ӧвӧл на. Йыр изе, синъёсы сюресэз адӟон понналы гинэ усьтӥсько. Ас дуннеям...

Школае гинэ пырисько...шальтыр-вальтыр ваньмыз куашка. Йырме сэзъялтӥсько но соку ик сайкасько. Юр-яр пиналъёс котькытын. Урокъёс ӝог ортчо. Арняос эшшо ӝоггес. Валаса ик уг быдтӥськы, али гинэ городэ лыктӥ вал кадь но, нош бертӥсько ин. Выходнойёсы городэ кыльыны чик уг быгатӥськы.

Та сярысь гожтэме уг поты вал кутскыкум...Кышкыт. Кышкыт улыны. Улон дуноя. Доллар, евро будо, будо. Дунъёс котькын йыло, ваньмыз дуно. Нош уждун малы ке сыӵе ик! Кӧня ке процентлы бюджет сфераын ужасьёслы уждунзы йылоз! пе. Йылӥз. Вань надбавкаосты куштӥзы. Уждун не только ӧз буды, даже кытын ке кулэсмиз но!

Трамвайын мынӥсько. Мышкам кышномуртъёс верасько. Кытын ма сиёнлы кыӵе дун да мар да. Паймисько сыӵе адямиослы, кудъёсыз ваньзэ тодо: ма, кытын, кӧня. Мон хоть ваньзэ тодылытэк кылисько.  Курег пуз кулэ-а шуэ, нырысетӥ сорт 7 манет, пе, ини. Ма но ӧвӧл, малпасько, алигес 53-ен бичай вал ай. Курегъёс гуртын уг ни пузало ни но, магазинысь басьтоно луиз кукей, соин тодӥсько. Я, гуртын улыны луоз ай эшшо ке, ваньмыз аслад: кукеед но, вӧйыд но, йӧлыд но, нянед но, кулэ ке. А вообще то ӧвӧл. Калык азьтэм луэмын ин туэ. Скалзэс кушто, турын уг турнаськы, бусыос утялтэмын ӧвӧл, мазы-о вань сыӵе  гуртын улӥсьёслэн? Городын улӥсьёс сямен кадь, магазинысь ваньзэ басьто, оломаин тырем сиён-юонэз!

Оло тросэз гуртэ бертыса асьсэос хозяйство нуозы?! Берты вылэм! Бертэ вылэм егитъёс! Бертысалзы. Корка пуктыны музъем луысал ке. Ӧвӧл ук милям музъеммы. Соин ик музъем вылэ дунъёс но сыӵеесь, валамон ӧвӧл-а мар-а. Ну и улэ соку ньыль сэрэго комнатаез снимать карыса, кык нылпиен и коӵышен. А-а, уг поты, соку ипотека кутыса одӥг комнатаё квартира басьтэ. Выль коркаын, кытын ваньмыз самой дунтэм пуктэмын, пуктэмын ке. Собере тыре быдэс улондэс, дӥськут басьятэк, концертэ ветлытэк, шутэтскытэк.

Трос малпаськоно ӧвӧл, дыр. Йыр пилиськыны кутске. Ӧжыт мар ке лэсьтыны но кулэ,дыр...

понедельник, 8 декабря 2014 г.

Азьмуртъёсы

Выль классмес чебергес, чылкытгес карыны выриськом. Туннэ тюльёс ошылӥм. Мон вообще но уг яратӥськы, куке комната тюльёстэк но дорожкаостэк. Ӵуказе борддоръёс вылэ бумагалэсь лэсьтэм сяськаосты лыкыло, укно тюльёс вылэ снежинка вандылыса ошылом. Одӥг палаз гужем, мукет палаз тол мед луоз. И вообще но выжыкыл кадь Выль ар азьын дорамы мед луоз! Пиналъёслэн мылкыдзы эшшо но золгес мед ӝутскоз дорамы ветлыны!

Классын партаосмы П букваен пуктылэмын. Пумитам кык ӝужыт парта сылэ, урдэсъёсаз лапегесьгес. Так вот, мынам чакламея, со ӝужыт партаосы лидеръёсгес пуксё, сыӵе классъёсын, кытын со туж яркыт адӟиське. Нош куд-ог классъёсын лидерзы яке лидеръёссы мукет группае кылемын луо.

Туннэ чакламъёсы пиналъёслэн асьсэды воземзы пыр шараяськизы. Яратоно куинетӥ кадетской класс вуиз.Куинез пияшъёс, кудъёсызлэн зэм но азьветлӥсь манеръёссы вань, сразу со интыосы пуксизы. Ньылетӥез мукет азе пуксе вал но, собере ӧжыт малпаськиз но, вӧзазы ик пуксиз.

- Татын президентъёс пуко. А тӥ ваньды (мукет дышетскисьёс шоры возьматыса) депутатъёс.
-Собраниез можно кутскыны, - шуэ вӧзаз пукись пияш.

Соос эшшо куспазы люко на кин кин луоз шуса. Волков, Путин фамилиос кылӥсько.

- Озьы луыны быгатэ шат? Сразу ньыль президент?-ожалтӥсько мон.
- Луэ. Если ке со совет президентов.
- Странаямы одӥг гинэ президентмы ук! Нош глава республики кин?
-Ммм...Соловьёв!
- Нимыз кызьы сэре?
-Александр!
 Звонок жингыртытозь шудӥзы на президентъёс но депутатъёс шуса, собере ӟечбуръяським но, мон огшоры дышетӥсь луи, нош соос огшоры нылпиос.

воскресенье, 7 декабря 2014 г.

Вай! шу,Лера

 Мусыльтокмес яратыны тубам. Декабре али 9 толэзь луоз ин. Иии, чупырга! Кык секунд но интыяз уг пукы!

Котькуд бертэммылы быдэ маке но выльзэ дышетэмын луэ.

Азьло ик дедо тыл возьматыны дышетэм. Лера, тыл кытын-о шуса юаськод ке, соку ик утчаськыны кутске, и, зэм ик, тыл шоры возьматэ. Озьы ми соин трубаез но пӧсь-а, ӧвӧл-а шуса эскерыны ветлӥськом. Кызьы агай-вынъёсыз каро шуса юаськод ке, тожо возьматэ. Я, кызьы-о Лера ладушки каре? Тич-тач пичи киосыныз чабыны кутске.

Котькуд нунал ум вуллӥське бере, нырысь минутъёссэ муртамгес кариське, собере дыше. Таязэ дышетӥллям тыл ӝуатны но кысыны. Чиньыеныз выключатель вылтӥ нуллэ-нуллэ но шлач! кысэ.

Ныре пип! карны но дышетӥлям. Только азямы особо ӧз возьматы, керпотӥз.

Шарен ми соин шудӥм ог огмылы лэзьяса. Шарзэ чупа, сэре гинэ зӥртэ.  Чабе, шумпотэ, сэре пичи киосыныз вай шуса возьматэ. "Вай! шу, Лера!" Учке шорамы но: "Ва!" шуэ. Дото мусо кылӥське! Бамъёссэ ик сием потэ.

Ӝоген вераськыны но йӧндыртоз ин. Лабыр удмурт кылын вераськоз.

среда, 3 декабря 2014 г.

Дуно куномы

Туннэ дорамы, кыкетӥ класс доры, Богдан ветлӥз. Сюлмаськи малы ке но туж. Собере ассэ адӟи но, соку ик ваньмыз ортчиз.

Пиналъёс но туж витизы та пумиськонэз, кырӟан дасязы, открытка суредазы. Тулкымъяськи, мар ке но уз пӧрмы но дуно куномы дорозямы уз вуы шуыса. А со сыӵе ӟечок! Воргорон кылзэ возиз!

Только  вунэтӥськем вераны Богданлы, пиналъёсы кыкетӥ классын гинэ дышетско ай шуыса. Паймиз. Номыре но соос уз валалэ ук ай, шуэ. Соос самой главнойзэ валаны кулэ: малы кулэ удмурт кылэз дышетыны.

Мон ас поннам малпаськи-малпаськи но, таӵе йылпумъянъёс аслым лэсьтӥ. Со бен кемалась сыӵе йылпумъянъёс лэсьтэмын ини но, ас вылам вуиз ук табере. Пиналэз котькӧня выр дышетыны, котькӧня визьлюк донганы выр йыраз, со ноку но сое ваньзэ йыраз уз кельты, пока солы аслыз тунсыко уз поты! Соин ик, котьку но, пиналъёсын ужаку, соосты кулэ заинтересовать но замотивировать. Кыӵе ке но асьсэлы пайдазэ адӟыны кулэ, яке общенилэсь умой мылкыд басьтыны кулэ соос. 

Малпай туэ тросгес егит удмуртъёсты чортылыны. Мед валалозы, мон огнам сыӵе удмурт кылын вераськись ӧвӧл шуыса, мед адӟозы, кытын удмурт кылзэс соос улоназы кутыны быгатозы шуса! Жаляса верано, тросэз соглаш луо кадь лыктыны но, собере дырзы уг луы, яке уг пӧрмы...

Нош Богданлэн туннэ 20 адямилы тросгес фанатъёсыз луизы дыр! Бодан кылбуръёссэ но лыдӟиз, номырзэ но ӧз валалэ ай ке но, удмурт кылъёссэ кылӥзы но ӟуч кылэ берыктӥзы зато. Ullapala Boy проект сярысь но тодӥзы, кырӟанъёссэ но кылӥзы. Мурӝол Underground проект сярысь но вераським! Таиз золгес пытьы кельтӥз кадь мылкыдазы, малы ке шуоно, кык клипсэ учким но, юанъёс только так сётъязы. По-детски шузиоссэгес ке но юалляськизы, Богдан соослы рос-прос валэктон сётылӥз. Пальпотэмме ватыны тырши, шумпотӥ но. Озьы но, тазьы но эскеризы куномес пиналъёс. Яраз.


"Мы суперудмурты" клипез учкыкузы, сьӧраз нёжтӥзы но, ява. Нош пумиськонмы бырыку, пиналъёс одӥг кырӟанзэ, табере эшмылэсь ини, кырӟаны куризы. Асьсэос тэтчыса ик эктыны бордаз дась вал ини.




Туж но туж оскисько, Богдан пиналъёсылы туж яркыт адӟем карымон адями луиз шуыса! Аслаз тыршеменыз гинэ, аслаз удмурт кылын тунсыкъяськеменыз гинэ со сыӵе ассэ будэтӥз, пуш дуннезэ узыр кариз. 
Котыртӥзы, автографсэ курыны тетрадьёссы вылын :)


фото на память
Пиналъёсы пӧлын но азинсконъёс шӧдӥсько гинэ ин. Ас мылкыд каремзыя вераськозы-а соос, уз-а, улон возьматоз. Нош мон тыршо соослы удмуртэз борды тунсыкъяськон пыӵатыны.