Удмурт вузаськись

Ура! Ура! Куке но соку аслым выль удмурт дэремлы басма басьтӥ! Дэра дэреме сыӵе но жаль потэ. Секыт но со, пӧсь но соин. Нош кроез туж яра, сыӵе ик вурыны кури.

Любаен басма утчаса центрысь вань магазинъёстӥ ортчим. Любалэн со огшоры маршрут, нош мон жадисько озьы ветлыны. Туж трос ваньмыз. Син азьын ваньмыз пиштэ, ворекъя, чиля. Бырйыны ик секыт. Одӥг басма яра ке ведь, мукет азьысь учконо на ай. Котьку милям озьы луэ: нырысетӥ магазинысь мае ке шедьтӥськом, сэре ваньзэ-ваньзэ ортчисько, пумаз нош отчы ик вуиськом.

Таяз ветлыкумы эшшо но тросгес ортчим. Почти берпуметӥяз пырим ни вал. Удмурт кышномурт-басьяськись телефон пыр кызьы ма вурыны шуыса вераське. Тунсыко. Кытысь ке Пурга палась: ы-ы шуэ.

Мынӥм мукетаз, кыдёкын ик ӧвӧл. Люба удмурт кылын телефон пыр вераське, мон тесьма учкисько.

- Мар-о, нылъёс, бырйиды-а?

Синъёсы ик кымесам тубизы, куаретыны ик соку ик ӧй быгаты паймоннам.

- Ӧм... Нош кыӵе приятно, куке удмурт кылын куарето!
- Ма кызьы приятно уз луы, ас кылын куаретозы ке! Куаретӥсько тани!
-Бигерысь-а Тӥ,- соку ик валатски вераськемысьтыз.
-Учкы ай, кытысьме но тодӥзы.
- "Вераськиськом удмурт кылын" наклейка ляке. Кылэмды вань-а сыӵе акция сырысь?
-Ӧвӧл...

Дэреме дась луиз ке, тесьма басьтын отчы мыно!

Дуно улон

Арнязэ шуккем кадь ветлӥсько ин. Будто ке мон-со не мон. Ульча кузя мынӥсько но, киноын кадь, ваньзы кытчы ке дырто-дырто, бызё, нош мон пыдъёсме мырдэм, гыж-кал кыскаса вамышъясько. Пельёсам ӵоксэтъёс кадь донгамын, ваньмыз бус пыр кадь, укно пияла пушкын кадь...Сайкамын ӧвӧл на. Йыр изе, синъёсы сюресэз адӟон понналы гинэ усьтӥсько. Ас дуннеям...

Школае гинэ пырисько...шальтыр-вальтыр ваньмыз куашка. Йырме сэзъялтӥсько но соку ик сайкасько. Юр-яр пиналъёс котькытын. Урокъёс ӝог ортчо. Арняос эшшо ӝоггес. Валаса ик уг быдтӥськы, али гинэ городэ лыктӥ вал кадь но, нош бертӥсько ин. Выходнойёсы городэ кыльыны чик уг быгатӥськы.

Та сярысь гожтэме уг поты вал кутскыкум...Кышкыт. Кышкыт улыны. Улон дуноя. Доллар, евро будо, будо. Дунъёс котькын йыло, ваньмыз дуно. Нош уждун малы ке сыӵе ик! Кӧня ке процентлы бюджет сфераын ужасьёслы уждунзы йылоз! пе. Йылӥз. Вань надбавкаосты куштӥзы. Уждун не только ӧз буды, даже кытын ке кулэсмиз но!

Трамвайын мынӥсько. Мышкам кышномуртъёс верасько. Кытын ма сиёнлы кыӵе дун да мар да. Паймисько сыӵе адямиослы, кудъёсыз ваньзэ тодо: ма, кытын, кӧня. Мон хоть ваньзэ тодылытэк кылисько.  Курег пуз кулэ-а шуэ, нырысетӥ сорт 7 манет, пе, ини. Ма но ӧвӧл, малпасько, алигес 53-ен бичай вал ай. Курегъёс гуртын уг ни пузало ни но, магазинысь басьтоно луиз кукей, соин тодӥсько. Я, гуртын улыны луоз ай эшшо ке, ваньмыз аслад: кукеед но, вӧйыд но, йӧлыд но, нянед но, кулэ ке. А вообще то ӧвӧл. Калык азьтэм луэмын ин туэ. Скалзэс кушто, турын уг турнаськы, бусыос утялтэмын ӧвӧл, мазы-о вань сыӵе  гуртын улӥсьёслэн? Городын улӥсьёс сямен кадь, магазинысь ваньзэ басьто, оломаин тырем сиён-юонэз!

Оло тросэз гуртэ бертыса асьсэос хозяйство нуозы?! Берты вылэм! Бертэ вылэм егитъёс! Бертысалзы. Корка пуктыны музъем луысал ке. Ӧвӧл ук милям музъеммы. Соин ик музъем вылэ дунъёс но сыӵеесь, валамон ӧвӧл-а мар-а. Ну и улэ соку ньыль сэрэго комнатаез снимать карыса, кык нылпиен и коӵышен. А-а, уг поты, соку ипотека кутыса одӥг комнатаё квартира басьтэ. Выль коркаын, кытын ваньмыз самой дунтэм пуктэмын, пуктэмын ке. Собере тыре быдэс улондэс, дӥськут басьятэк, концертэ ветлытэк, шутэтскытэк.

Трос малпаськоно ӧвӧл, дыр. Йыр пилиськыны кутске. Ӧжыт мар ке лэсьтыны но кулэ,дыр...

Азьмуртъёсы

Выль классмес чебергес, чылкытгес карыны выриськом. Туннэ тюльёс ошылӥм. Мон вообще но уг яратӥськы, куке комната тюльёстэк но дорожкаостэк. Ӵуказе борддоръёс вылэ бумагалэсь лэсьтэм сяськаосты лыкыло, укно тюльёс вылэ снежинка вандылыса ошылом. Одӥг палаз гужем, мукет палаз тол мед луоз. И вообще но выжыкыл кадь Выль ар азьын дорамы мед луоз! Пиналъёслэн мылкыдзы эшшо но золгес мед ӝутскоз дорамы ветлыны!

Классын партаосмы П букваен пуктылэмын. Пумитам кык ӝужыт парта сылэ, урдэсъёсаз лапегесьгес. Так вот, мынам чакламея, со ӝужыт партаосы лидеръёсгес пуксё, сыӵе классъёсын, кытын со туж яркыт адӟиське. Нош куд-ог классъёсын лидерзы яке лидеръёссы мукет группае кылемын луо.

Туннэ чакламъёсы пиналъёслэн асьсэды воземзы пыр шараяськизы. Яратоно куинетӥ кадетской класс вуиз.Куинез пияшъёс, кудъёсызлэн зэм но азьветлӥсь манеръёссы вань, сразу со интыосы пуксизы. Ньылетӥез мукет азе пуксе вал но, собере ӧжыт малпаськиз но, вӧзазы ик пуксиз.

- Татын президентъёс пуко. А тӥ ваньды (мукет дышетскисьёс шоры возьматыса) депутатъёс.
-Собраниез можно кутскыны, - шуэ вӧзаз пукись пияш.

Соос эшшо куспазы люко на кин кин луоз шуса. Волков, Путин фамилиос кылӥсько.

- Озьы луыны быгатэ шат? Сразу ньыль президент?-ожалтӥсько мон.
- Луэ. Если ке со совет президентов.
- Странаямы одӥг гинэ президентмы ук! Нош глава республики кин?
-Ммм...Соловьёв!
- Нимыз кызьы сэре?
-Александр!
 Звонок жингыртытозь шудӥзы на президентъёс но депутатъёс шуса, собере ӟечбуръяським но, мон огшоры дышетӥсь луи, нош соос огшоры нылпиос.

Вай! шу,Лера

 Мусыльтокмес яратыны тубам. Декабре али 9 толэзь луоз ин. Иии, чупырга! Кык секунд но интыяз уг пукы!

Котькуд бертэммылы быдэ маке но выльзэ дышетэмын луэ.

Азьло ик дедо тыл возьматыны дышетэм. Лера, тыл кытын-о шуса юаськод ке, соку ик утчаськыны кутске, и, зэм ик, тыл шоры возьматэ. Озьы ми соин трубаез но пӧсь-а, ӧвӧл-а шуса эскерыны ветлӥськом. Кызьы агай-вынъёсыз каро шуса юаськод ке, тожо возьматэ. Я, кызьы-о Лера ладушки каре? Тич-тач пичи киосыныз чабыны кутске.

Котькуд нунал ум вуллӥське бере, нырысь минутъёссэ муртамгес кариське, собере дыше. Таязэ дышетӥллям тыл ӝуатны но кысыны. Чиньыеныз выключатель вылтӥ нуллэ-нуллэ но шлач! кысэ.

Ныре пип! карны но дышетӥлям. Только азямы особо ӧз возьматы, керпотӥз.

Шарен ми соин шудӥм ог огмылы лэзьяса. Шарзэ чупа, сэре гинэ зӥртэ.  Чабе, шумпотэ, сэре пичи киосыныз вай шуса возьматэ. "Вай! шу, Лера!" Учке шорамы но: "Ва!" шуэ. Дото мусо кылӥське! Бамъёссэ ик сием потэ.

Ӝоген вераськыны но йӧндыртоз ин. Лабыр удмурт кылын вераськоз.

Дуно куномы

Туннэ дорамы, кыкетӥ класс доры, Богдан ветлӥз. Сюлмаськи малы ке но туж. Собере ассэ адӟи но, соку ик ваньмыз ортчиз.

Пиналъёс но туж витизы та пумиськонэз, кырӟан дасязы, открытка суредазы. Тулкымъяськи, мар ке но уз пӧрмы но дуно куномы дорозямы уз вуы шуыса. А со сыӵе ӟечок! Воргорон кылзэ возиз!

Только  вунэтӥськем вераны Богданлы, пиналъёсы кыкетӥ классын гинэ дышетско ай шуыса. Паймиз. Номыре но соос уз валалэ ук ай, шуэ. Соос самой главнойзэ валаны кулэ: малы кулэ удмурт кылэз дышетыны.

Мон ас поннам малпаськи-малпаськи но, таӵе йылпумъянъёс аслым лэсьтӥ. Со бен кемалась сыӵе йылпумъянъёс лэсьтэмын ини но, ас вылам вуиз ук табере. Пиналэз котькӧня выр дышетыны, котькӧня визьлюк донганы выр йыраз, со ноку но сое ваньзэ йыраз уз кельты, пока солы аслыз тунсыко уз поты! Соин ик, котьку но, пиналъёсын ужаку, соосты кулэ заинтересовать но замотивировать. Кыӵе ке но асьсэлы пайдазэ адӟыны кулэ, яке общенилэсь умой мылкыд басьтыны кулэ соос. 

Малпай туэ тросгес егит удмуртъёсты чортылыны. Мед валалозы, мон огнам сыӵе удмурт кылын вераськись ӧвӧл шуыса, мед адӟозы, кытын удмурт кылзэс соос улоназы кутыны быгатозы шуса! Жаляса верано, тросэз соглаш луо кадь лыктыны но, собере дырзы уг луы, яке уг пӧрмы...

Нош Богданлэн туннэ 20 адямилы тросгес фанатъёсыз луизы дыр! Бодан кылбуръёссэ но лыдӟиз, номырзэ но ӧз валалэ ай ке но, удмурт кылъёссэ кылӥзы но ӟуч кылэ берыктӥзы зато. Ullapala Boy проект сярысь но тодӥзы, кырӟанъёссэ но кылӥзы. Мурӝол Underground проект сярысь но вераським! Таиз золгес пытьы кельтӥз кадь мылкыдазы, малы ке шуоно, кык клипсэ учким но, юанъёс только так сётъязы. По-детски шузиоссэгес ке но юалляськизы, Богдан соослы рос-прос валэктон сётылӥз. Пальпотэмме ватыны тырши, шумпотӥ но. Озьы но, тазьы но эскеризы куномес пиналъёс. Яраз.

"Мы суперудмурты" клипез учкыкузы, сьӧраз нёжтӥзы но, ява. Нош пумиськонмы бырыку, пиналъёс одӥг кырӟанзэ, табере эшмылэсь ини, кырӟаны куризы. Асьсэос тэтчыса ик эктыны бордаз дась вал ини.

Туж но туж оскисько, Богдан пиналъёсылы туж яркыт адӟем карымон адями луиз шуыса! Аслаз тыршеменыз гинэ, аслаз удмурт кылын тунсыкъяськеменыз гинэ со сыӵе ассэ будэтӥз, пуш дуннезэ узыр кариз. 

Котыртӥзы, автографсэ курыны тетрадьёссы вылын :)

фото на память

Пиналъёсы пӧлын но азинсконъёс шӧдӥсько гинэ ин. Ас мылкыд каремзыя вераськозы-а соос, уз-а, улон возьматоз. Нош мон тыршо соослы удмуртэз борды тунсыкъяськон пыӵатыны.

Суперудмуртлы суперпривет

Ӝытазе Эляба жингыртӥз.

- Привет! Туннэ веразы, Богдан Кремльын кырӟалоз шуса! Привет вера, йетэ! Суперудмуртлы суперпривет вера! Азинсконъёс азьланяз, шу, мед эшшо но тросгес гожъялоз на! Клипсэ но учким ин, "Суперудмуртызэ".

Одӥг но вис ӧй кары, мыняса кылзӥськисько.

- Яраз-а сэре клипез?
- Ма яраз, малы-о уз яра. Адями тырше ук, турттэ, лэсьтэ. Шарканэз но, Гондырваез но, Сюрсоваез но поттылэ. Сэ милем яра ин!

Нош мынясько ас поннам.

- Я, обязательно верало.

Эляба Богданэз куке кокрокен сюдӥз вал. Сё ровно аслаз каре ин таре, сюлмаське.

Одӥг нылпи - ӧвӧл нылпи

Толон дебатъёсын "трос нылпиё семья-шудо семья" тема ӝутэмын вал. Пиос соку ик чутырак ӧвӧл шуизы. Одӥг пинало семья, пе, шудогес. Только малпанзэс одӥг аргумент котырын гинэ бинязы-коньдон. Нылъёс соослэсь юазы, кыӵе, пе, луоз обществомы, сыӵе  апайтэк-вынтэк будӥсь пинало семьяос гинэ луизы ке.

Туннэ ик ваньзэ шӧдӥ ин ас вылам! Ух пурӟи! Вӥрзӥбетэ ик ӝутӥськиз!

Ну ӧм шедьтэ ни ми ог кыл со ньылетӥ кадет классэн. Дас пиос, ньыл нылъёс. Нылъёссы лябесь, но чалмыт пуко. Пиоссылэн визьзы но вань, нош кылзэс уг ик шӧдыло, дышетӥсьлэн авторитетэз ик ӧвӧл. Асьсэ дышетӥсьсылэсь гинэ кӧберзы вань.

Туннэ кык пиналлэн анай-атайёссы лыктыны кулэ вал.Лыктӥзы о-о, дас пол! Ну малы мон сыӵе адямиослы оскисько. Ай эшшо, кызьы мон валай, пиналъёсынызы вераськиллям на. Соос мыным туннэ заявили, малы, пе, мамаосмы дырзэс быдтыса школае ветлыны кулэ, соос ведь, пе, коньдон зарабатывать каро. Ай, эшшо, тӥляд, пе, пиналды лусал ке, тӥ пе тоже ужасалды и коньдон поттысалды, мед пиналды школае ветлоз шуса,  а не уроке  мынсалды! Ну прямо валатске, мамаезлэн кылъёсыз шуса, пинал ачиз озьы ӧй верасал. Оххх! Йыры кур луиз! Вообще-то, шуисько, мынам пиналы лусал ке, мон отчы но татчы но вуысал! А тӥляд мамаосты тӥ понна, шуисько, воксё уг сюлмасько! Со туж но туж непедагогично вал мон ласянь! Мыным сое родительской собрание лыктыса мамаоссылы верано вал. Только шусалзы мыным, да кин тон сыӵе, зырымесь, аслэсьтыд нылпиостэ азьло будэты ай! Соин ик мон собраниосы тыршисько ветлытэк.

Вот озьы ик луэ со улонын. Анай-атайёс ужало, ужало, ужало, коньдон потто, потто, потто, пиналъёссылы умой мед луоз шуса но. А пиналзэс уг но адӟыло, ма отын солэн школаын, ма отын солэн малпанъёсаз, ма отын солэн дышетӥсен кусыпъёсаз. Дунне! Ваньмыз вылэ дунне! Нош пинал вай, вай, вай гинэ шуэ на, аслэсьтыз обязанностьёссэ вунэтыса.

Со классы ик мон туннэ виноват луи,  пияшлэн дневниказ замечание гожтӥ шуса, малы ке шуоно со гуртысь ужзэ ӧз лэсьты. Урок бере кельтыса вераськи мон соин. Ӧз юртты. Со али ик сыӵе лек, мон вылэ, мамаосыз вылэ, вань дунне вылэ! 

 Мар отӥяз луоз, уг тодӥськы. Нош точно тодӥсько, аслам пиналъёсы ужез тодозы шуса но вай гинэ уз шуэ шуса. 

Удмурт кылын дебатъёс

Яратоно диванме ӝытлы огназэ  мӧзмыны кельтыса, ДДН-э удмурт кылын дебатъёсы шонтӥ. Огнам. Так то ке уг яратӥськы огнам ужрадъёсы ветлыны. Ну раз татын куинь метр вамыштоно бере, мыноно кариськи.

Ужрад дырыз дыръя ӧз кутскы, жюриос бере кылемен. Но мон Вероникаен вераськыны вуттӥ зато. Со ӝытэз нуиз. Вообще туж ас интыяз вал. Зэм но ВАУ, аслэсьтыз ужзэ тодэ. Пумен нуэ но, шутитьтэ но, зал кузя кытчы гинэ ӧз вуылы! Умой так то дышетӥсь пӧрмысал, дыр, солэсь.

Ӵошатскизы куинь команда. Киосме мон вози Аня но Марина понна, оло соосты гинэ тодӥсько вал ваньзы пӧлысь шуыса. Но мыным сыӵе приятно вал, дебатъёсы сыӵе егит удмуртъёс но пыриськы, кудъёсыз "Шунды" сярысь кылем арын гинэ тодэмын ай!

Кык кузя пиос Балтаси ёросысь Бигерысь шуизы асьсэды. Мон валай, соослы секытгес вераськы вал шуыса! Ас доразы мукет диалектсы ук! Нош татын не только ас малпандэ шараяно, доказать кароно, а верано чебер, ваньзылы валамон кылын. Диалектной кылъёссы потазы ик бен, ваньзы оло ӧз но валалэ.

Асме мон нош ик ӧй дунъя. Уг быгаты малпай. Быгатысал! Тэтчыса ик куддыр потэм но верам потэ вал. Куддыр мыняса пуки, куддыр синъёсме ватыса, куддыр азьпала сётӥськыса ик, туж сак кылзӥ.

Вормизы самой золъёсыз, самой дасяськемъёсыз, самой "в теме" адямиос. Туж шумпотӥ Аня но Марина понна.

Калык пӧлын, калык азьын вераськыны дышетсконо. Котькӧня синучкон азьын бергаса асэныд вераськы но, калык азе потӥськод ке, со чылкак мукет. Вань кылъёс но вуно кытчы ке, пыд улысь музъем но кошкыны кутске кадь, бамъёс но малы ке льӧль луыны кутско.

Калык азьын вераськыны кышкан куинь самой зол кышканъёс пӧлы пыре. Туннэ вормизы ваньзы. Хотя бы асьсэды асьсэос.

Удмурт дышетӥсь ӟуч коллективын

Кыӵе ке полоса везения. Стоило одӥг пол  ӧжыт воштӥськыны...

Ӵуказе ми каморкаысьтымы нормальной зэмос классэ выжиськом, нырысетӥ этаже. И ӵуказе ик кема возьмам бумбоксмес но сётозы! О! Мылкыд ик ӝутске ужаны! Даже малпаны но кышкасько, кыӵе мукет, нормальной условиосын ужаны луоз ини шуса! Пиналъёс ваньзы уг тодо ай, тодӥсьёсыз нош ӧректэмынэсь кадь!

Котырысьтым адямиос но валазы, лэся, востэмен востэм, нош ас поннам дурбасьтыны быгатӥсько шуса. Вуттӥзы ини, тыбыр сьӧрам ӧзьы верасько шуса. Котьма мед вераськозы, тьфу! Ог огзылы пальпото но, мышказы ик сяласа кельто сэре асьсэос ик. Мон сыӵе ӧвӧл. Созэ но, тазэ но кылзӥськисько но, нокин пала уг кариськиськы сэре. Соин ик мон ас поннам. Отын но монэ ас котыразы уг каро, татын но. Секыт ӟучъёсын.

Туннэ одӥг класслы ультиматум пуктӥ. Анай-атайёссытэк урокъёссэс уг нуы шуи! Кызьы вообще дӥсьтӥ озьы дышетӥсьсылы шуыны, татчыозь уг тодӥськы. Довели, нимаське со. Туж умой, шуиз, однако. Список но лэсьтӥ, кинлэн анай-атайёссы ку  ветлозы.

Дышисько ни каллен.  Удмурт дышетӥсь ӟуч коллективын ужаны.

Пот, пот, шундые!

Ура!Ура!Ура! Пиналъёсме куке но соку, таяз арын , школаысь поттӥ. Филармоние "Пот, пот, шундые!" концерт-интерактиве ветлӥм.

Концерт-интерактив афиша вылазы гожтэмын вал. Огъя ке, туж шумпотӥ, пиналъёсме татчы вайылӥ шуса, а эшшо тросгес анай-атайёссы понна на. Соос но залын пукизы. Пиналъёсы трос тодмо удмурт кылъёс кылӥзы, куд-ог кырӟан-шудонъёсты тодмазы.

Табере радызъя. Милям 13-тӥ ряд вал. Пиналъёсы пичиесь-кыкетӥ класс. Пичи миндэръёс дасямын но ке вал вылазы пуксьыны, ваньзылы пиналъёсылы ӧз тырмы. Куатаськылӥзы но кудъёсыз, бякаос. Залэтӥ бызьылоно луиз бадӟымгес пиналъёслэсь курыса. Мукет концертэ азьлогес но рядзэ матэгес басьтыны туртто.

Ачим мон мышказ пукси, балкон улэ, билетэ аслам ӧй вал бере. Тыл кысӥз, потӥз сцена вылэ нуись...Все, мылкыды куашказ. Пиналъёсы мӧзмыны кутскизы, дыр! Сыӵе шуг кылъёс, сыӵе огпӧртэм вераське, и нокыӵе пиналъёсын интерактивез ӧвӧл! Сейчас, малпасько, ӵашетыны, вераськыны, лякыттэмъяськыны кутскозы. 

Ваньзылы веразы, артистъёс микрофонтэк вераськозы шуса, чалмыт мед пукозы шуса. Мын но валэкты сое тямыс-укмыс аресъем пиналъёслы, куке соос ваньзы ог бордын пуко. Мон, удмурт кылын вераськись адями, вань верам кылъёссэс ӧй кылы, мае меда пиналъёсы кылӥзы. Веньёс вылын кадь пуки. 

Сэре сцена вылын нылъёс но пиос эктыны, шудыны, кырӟаны кутскизы. Тодмо шудонъёс но чузъяськизы. Ну, малпасько, ас понназы хоть кырӟазы, дыр, удмуртятаосы.

Концерт 40 минут мынӥз. А ма, шуо пиналъёсы, сыӵе ӧжыт. Аха, асьсэос ӝыны час ортчем бере ӵаш потто вал ин. Сейчас, шуисько, шудонъёс луозы на.

Ой, кыӵе Юля мыным жаль потӥз. Юля Павлова- концертэз пуктӥсь-радъясь Порозысь. Со ик ӧтиз вал милемыз.

Сыӵе орава пиналъёс, кудъёсыз почти пель йылазы сыло, а со огназ микрофонэн валэктыны выре шудон правилоосты. Мон, конечно, ӧй чида, ваньзэсты султытъяны, валэктыны кутски тожо, только микрофонтэк. Только малы ке сцена вылысь васькем нылъёс но пиос долкаса сылӥзы, паймизы кадь, мар татын происходит шуса. Юля интые, мон со пиналъёсызлы валэктысал вал азьло вань со шудонъёсты, собере пуктылысал котькудзэ аслаз интыяз, аслаз кругаз, на подхвате  мед луозы шуса. Ну, малпасько, радъясьёс асьсэлы йылпумъянъёс лэсьтӥзы. Куддыр бадӟым адямиос уг валало, мар соосты карыны косо, а татын пиналъёс, да эшшо сомында кузя!

Шудыса ваньзы шудоесь вал! Бертыкумы ульча тыр пиналъёсы кырӟаса бертӥзы. Удмурт кылын!

Яратоно ФУдФ

Вылез-со туж умой вунэтэм  вужез, шуо. Эшшо, милям историмы, адямилэн историез аспӧртэмлыко витокъёсын азьланьтӥське шуса.

А ведь кыдёкын, 1931 арын, Удмурт пединститут усьтӥськыку, ужаны кутскиз удмурт кылъя но литературая кафедра. Чылкак одӥгназ кафедра гинэ вал ай соку со. Аръёс азьлань мынэмъя, со кафедра будӥз но кужмояз. Калленэн ньыль пыд вылаз но султӥз кадь. Школаослы трос книгаос, учебникъёс, пособиос поттэмын вал кафедраысь тодосчиослэн тыршеменызы. Озьы, удмурт нылпиос доры вуизы удмурт книгаос. Соку ведь книгаез кыӵе гажало вал! Не то что али.

Удмурт кылъя но литературая кафедра не только ньыль пыд вылаз султӥз, но и кык пыд йылаз каллен-каллен вамышъяны кутскиз. Филология факультетын удмурт ёзэт усьтӥськиз. Татын дасяны кутскизы национальной кадръёсты.

Будӥз, будӥз кафедра. Кык пыд вылаз ветлыны ӧз тырмы ни солы, бызьылэмез но потӥз кадь! Одӥг кафедраысь, пӧртэм сюбег ӧръёсты эскерон понна, нимазъяськизы тодосчиос но кылдытӥзы выль кафедраос. Та дырысен лач-лач будӥзы, пушйизы, юнмазы, сяськаязы кадь удмурт кылэз но литератураез эскерись ӧръёс, кафедраос.

1992 арын йӧн-йӧн. быдэ вуыса ни, кылдӥз Удмурт филология факультет. Мыным соку арес гинэ вал ай. Мон будэмъя, факультет но азинскиз, паськытаз, сяськаяз. Пӧртэм тунсыко специализациос кылдылӥзы но, бырылӥзы но.

Мон сыӵе шумпотӥсько, ӵапак Удмурт филологиез йылпумъяй шуыса! Ноку но дышетӥсь уг луы шуисько вал. Кылдэмез озьы лэся. Факультетысьтымы дышетӥсьёсын, деканэн луыса табере мон дышетӥсь.

Факультетэ сётӥз мыным сыӵе умой эшъёс! Сыӵе эшъёсты утчано на! Вить ар- со вал самой шудо, беззаботной аръёс! Куке ми номыр сярысь ум  сюлмаськиське вал (урокъёс сяна), куке ӵукнаысен ӝытозь вераськиськод удмурт кылын, куке бордад котьку но мусо, визьмо удмурт адямиос, кудъёсыз, тон тодӥськод, котьку но юрттозы.

Мон али ӟуч кылын вераськыны дышигес ин. И али гинэ валай, кыӵе мон удмурт коллективлэсь мӧзми! Зэмзэ но, удмуртъёсын кыӵе ке но капчигес...

Может, та эшшо одӥг виток, одӥг этап асьме историямы. Может, али Удмурт филология факультетэз пыдес вылаз уськытозы, нош собере лыктозы выль удмуртъёс, супер удмуртъёс, но нош ик ӝутозы...Наивная.

Ваньмыз милям киосамы. Туала удмуртъёслэн.

Светлана Копылова-бард

Вань дуннее сӧрӥськыса пальккиськиз, векчи пырыослы  пазьгиськиз но, йырынуллань берытскиз кадь.

Дышетӥсе поттылӥз ни вал кыӵе ке но кышномурт-бард сярысь. Возьматыны но турттэ вал, только мынам дыры ӧй вал. Туннэ урокъёс бере пырисько но, пиналъёсызтэк пуке, кырӟан кылзӥське. Аа, шуисько, самой со-а та. О-о, пе.

Кырӟасезлэн нимыз Светлана Копылова. Иже но вуллэм ни со. Концертысьтыз ваньзы бӧрдыса пото, пе. Со гожъя кырӟанъёс-притчаос. Котькуд кырӟаназ сыӵе мур улон возьматэмын, простые истины, ӟуч сямен вераса. Котькуд адями, мыным потэ, адӟоз солэн кырӟанъёсысьтыз котырысьтыз адямиоссэ яке оло ассэ но.

Кык кырӟан-видеозэ мон учки школаын. Ӧй чида, эмоциосы кыре потӥзы. Я, пиналъёс ӧй вал. Бен, валасалзы, дыр. Классный час дыръя возьматэм ни вылэм дышетӥсьсы соослы но. Бӧрдӥллям...

Сыӵе котырын адямиос лекесь! И ачид но тон каллен лекомиськод, чурыт луиськод кадь. Улонысьтым учыръёсты тодам вайисько ке али, возьыт луэ...

Дышетӥсьлэсь быгатонъёссэ будэтон курсъёс

Мынам кыкетсэ арня каникулъёс. Честно ке, ӧвол. Вань "англичанкаосынымы" курсъёсы гожтӥським но ветлӥськом. Быгатонлыкъёсмес будэтон курсъёс (курсы повышения квалификации).

Люкаськем дышетӥсьёс шоры учки, учки но, кылзӥськи, кылзӥськи но, малпай, эээ, нылашка, мын берт. Мын ай дышетскы но дышетскы на. Трос мае валасько шуса малпасько вал ин, ан нет. Всё познается в сравнении.

Москваысь туж тодмо тодосчиос лекция лыдӟизы милем. Одӥгез учебникмылэн авторез! Сыӵе шанс тросэзлы ик уг сётӥськы,дыр. И ачиз, пе, со 12 ар завучын ужамын, ну и, конечно, англи кылъя дышетӥсь луыса. Пайми. Кышномуртлэн аресэз но вань ин, нош аслаз туала гаджетъёсыз сьӧраз, интернетэн но так гинэ выре, шӧдӥське. И сыӵе адямиосын пумиськыса, вераськыса, астэ нымы-кибы кадь шӧдыны кутскиськод.

Школаын дышетскыкум малпасько вал, школаын ужасал ке но, авторской программая ужасал шуса. Нош сыӵе программа лэсьтон понна, ӧй кӧня будоно! Туж оскисько, куке но будо ай сыӵе вакытозь шуса. Ведь удмурт кылъя пиналъёслы дышетскон программаос одӥг-кык, пал киысь чиньыосы тэрымон гинэ...

Котьку мед луоз чылкыт инбам

Кылем арняе удмурт классэ каникул возизы ни. Нош таяз арняе, куке ваньзы шутэтско, дышетскыны потӥзы. Дышетӥсьсы ӵыжы-выжыез доры Украинае ветлӥз. Сюлмаськыса кык-куинь пол уйвӧтам адӟи.

Туннэ адским ини. Киевын, шуэ, ваньмыз спокойно. Номыр но уг возьматы, куке но отын оломар турттӥське вал шуыса...Трос ма вераз. Но вуим одӥг йылпумъянэ, отын одӥг верало-возьмато, татын мукет. Отын но татын но кызьы кулэ "вылӥослы", озьы. Мон дугдӥ ини телевизор учкемысь. Одӥг иворъёс но та тематэк уг ортчо.

Одӥгзэ гинэ потэ, мед ваньмыз буйгатскоз ни! Сомында огшоры улӥсь адямиос быро.

Сояз арняе Донецкысь нылаш одӥгаз классам лыктоз. Кыӵе ни медам нылаш, мае адӟиз ни вылды ас улоназ.

Эляба. Элькуновидение

Толон Эляба жингыртылэм. Ӧй кылы, адӟем берам бер вал ин.

Туннэ жингыртӥ. Мар, шуисько,толон звонитьтылӥд. Болеть карид-а шуса, пе. Мон сразу ӧй вала. Ааа! шуисько, ӧй. Ӧй учкы.

Элькуновидение сярысь со озьы вера вылэм. Ми, пе, быдэс семьяен учким, эшшо ульчаысьтызы да милям ульчаысьтымы но даже доразы тубиллям на учкыны! Вот что значит тарелка пуктылӥзы ваньзы но, а "Мынам Удмуртие" цифраын ӧвӧл. Элябаслэн кык телевизорлы, юри-а мар-а дедо басьтӥз вал крутой телик, Удмуртиез учкыны антеннаен. Бызьылӥм, пе, вань телефонъёсысь смска ыстӥм. Тодэ но даже, кӧня куара Шаркан люказ. Ма бен паймонэз воксё ӧвӧл.

Со милям сыӵе. Сплетница, пе, мон, шуэ. Серекъя.

Льӧль йырсиё Эляба

Эшъёс ке вань

Улон шулдыр, эшъёс ке вань! Таосыз сыӵе шутэтскон нуналъёс вал, куке мон  туж шудо, но куке юмшаса ветлыса туж жадисько.

Почти вань матысь эшъёсме адӟылӥ!Сыӵе мыным соосын шуныт, гань-гань.Эшъёстэк улыны вообще уг быгаты, дыр. И котьку эшъёсын мыным удалтэ кадь. Школаысь эшъёсыным стабильно пумиськиськом. Ваньзылэн паръёссы но вань ин, семьями таре эшъяськиськом.

Университетын но эшъёсыным туж удалтӥз! Алигес гинэ фотоосты учкылӥ. Мар но дауртэмын ӧвӧл! Сыӵе ностальгия. Тросэзлэн тожо картъёссы вань ни. Таосыныз но семьяосын эшъяськиськом.

Школа но университет сяна но эшъёсы вань на! Таосыз улонэ мыным кузьма. Пумиськыса, вераськыса кӧт ик уг тыр.

Вера, кин тынад эшед, но мон верало кин тон, шуо ӟучъёс но. Мынам самой ӟеч эшъёсы! Ачим сярысь мон али уг вераськы, мед соос вералозы, кулэ луиз ке. Но мон котьку но тодӥсько и шӧдӥсько эшъёсылэсь кужымзэс, котьку юрттыны дась луэмзэс, капчи мылкыдзэс но эшлыкозэс! 

Мон тӥледыз туж яратӥсько!!!

Анай кыл

Столовойын туннэ трос дышетӥсьёс сиськыса пуко вал. Яра но кадь адямиосын сиськыны, уг но. Куддыр туж асме умойтэм шӧдыны кутскисько бордазы. А эшшо, адямиос азьын сиськыку вераськыны уг яратӥськы.

Ӝӧк сьӧры пуксьыкум вераськонзэс куспетӥ гинэ кылӥ ин. ...Да малы со удмурт кыл кулэ. Мыным, например, воксё но кулэ ӧз луы, пе. Ӝӧк тыр озьы секретарьмы но завхозмы верасько. Кышномуртъёс, кызьы бы верано, школаын ужало ке но, образованилэсь кыдёкынэсь. Мынам личной малпанэ. Завхозмы туэ гинэ монэным чырткемъяськыны кутскиз ай йӧнала, кылем арын куаретыса но мон шоры уг учкы вал.

...Да лучше, пе, английскиез мед дышетоз...Завучмы шуэ, кылэз дышетыны нокинлы но, пе, ӧз на люкеты. Так-то, шуисько, мон татын. Мон азьын хоть озьы эн вераське ни вал. Дак, пе, Тӥ понна номыр против не имеем. Удмурт кыл понна гинэ пе.

Пайми, ма вераны ик. Верасал но вылды но. Мылкыдме но, аппетитме но быдтэме ӧз поты. Всё равно таосыз доры не достучишься. Ас поннам келяй кыдёкегес. Собере сиськытозям кылзӥськоно луиз на, кызьы соос пиналъёссэс "воспитывать" каро.

Мда. Сыӵе арлыдъем адямиослы вряд ли мар ке йыразы шуккод на. Валасьёсыз асьсэос но валало. Ваньзэ кутсконо выльысен. Пиналъёс бордысен. Али поколение вылысен. Мон каллен турттӥсько. Англи урокъёсам ликбезъёс ортчытъясько. И неважно, удмурт- а со, пор-а, бигер-а, азербайджан-а, тодэ, шуисько, асьтэлэсь кылдэс! Тодыны, шуисько, ӧжыт, вераськоно! Ымзэс усьтыса ик кылзӥсько но, монэным соглаш луыса кадь йырынызы шонало. И соослы туж тунсыко потэ пӧртэм кылъёсысь кылъёсты тодыны! Малы, шуо, ми удмурт кыл ум дышетӥське тӥленыды. Пальпотӥсько гинэ но, ну, сыӵе шуисько тӥляд программады...

И вообще, мон шӧдӥ, "не ӟуч" пиналъёсы туж ӝог англи кылэз но схватывают! Куинетӥ классъёсын вань пор но азербайджан нылашъёсы, но бигер пияше, кудъёсыз шалтыр лыдӟисько ин англи кылын. Удмурт классэ сярысь веранэз ик ӧвӧл ни, одно удовольствие соосын ужаны! На лету ваньзэ валало, йыразы поно.

Мон валай, мынам йыры кур ӧвӧл завхозмы кадь адямиос вылэ, мыным соос жаль пото...

Вадим

Эшшо одӥгез пияшмы кошкиз на удмурт классысьтымы...

Шуак, инсульт луыса, мамаез больницае шедиз, собере комае усиз. Ӝыны толэзь куспын векчи сюсьтыл кадь ӝуаз, быриз. Кулӥз мамез...Куамын вал-а, ӧй-а меда солы...

Мон тодӥсько вал, комаын кылле шуса...но верамзы бере пигонъёсы ик пештырскизы, давление но тэтчиз кадь. Дышетӥсьсы вера но, синъёсыз сивуосын пачылмо. Ӧй быгаты возиськыны. Укно пала берыктӥськыса бӧрдӥ. Капчи ӧз луы. Та классын ик англи кыл нуоно вал.

Нош Вадим со нуналэ весь тэтчаса, серекъяса ветлӥз. Шораз учкыса эшшо но зол ӝожоми. Ӧй возьматы бен пиналъёслы, озьы ик урокме нуи. Юри сямен кадь темамы но "Семья".

Та секыт иворез солы нунал ортчыса гинэ веразы. Одӥг синвузэ но ӧвӧл кисьтэм, ас пушказ ваньзэ кельтэм. Лучше мед бӧрдсал...Может бен пиналъёс кулонэз кызьы ке мукет сяменгес сое воспринимать каро, прощегес-а мар-а. Уг тодӥськы, ма вераны ик.

Выходнойес бере пиосын шудса ветлэ вал ин Вадим. Ӧй ке тодсал, озьы шуса, ӧй но малпасал, кылем выходнойёсы самой матысь адямизэ ватӥз та пичи пияш шуса.

Всё, пиналмы омырын кылиз. Мамез сентябре бызем вылэм, картэз опекунство лэсьтыны ӧвӧл вуэм. Самой матысь адямиез-песянаез-гуртын. Нуиз пимес, ас бордаз басьтӥз.

Кылем пятницае берпуметӥ нунал дорамы дышетске, шуиз дышетӥсьсы. Удмурт кылзэ медам вунэты шуса, удмурт книгаос кузьманы малпай. Классазы пырко но, Вадим пальышаса доска вӧзын пукон вылын пуке. Нош эшъёсыз сое суредало вылэм. Кызь куинь портрет. Ужъёссылэн мышказы нимзэс но телефон номерзэс гожтӥзы на. Тодаз мед вайылоз шуса. Дышетӥсьсы пӧртэм кузьымъёсын (тетрадьёс, линейка, клей, ӵуж смайликъёсын наклейкаос но трос мукет на) папка дасям. Конечно довольной луод сыӵе вниманилэсь. Кыӵе умой всё-таки пиналъёсты вала дышетӥсьсы! Мон ваньзэ тае адӟыса нош ӝожоми...Ну кин малпаз вал!

Эктон корка

Ууууух! От души! Йӧскадь!

Туж яратӥсько "Эктон коркалэсь" таӵе ужрадъёссэ. Шутэтскисько. Сыӵе капчи луэ эктыса, эктыку адямиосын вераськыса-пальпотыса. Эктыса пыдъёс пыр вань уродэз, секытэз музэ кошке кадь.

И атмосфераез. Котьку но туж шуныт, эщлыко. Ваньзы ог-огзылы пальпото, шумпото. И неважно, быгатӥськод-а тон эктыны, уд-а. Самой важноез-со мылкыд. А мылкыдзы адямиослэн татын тууууж бадӟым!

Сыӵе классно, куке пӧртэм калыкъёс огазе люкасько ( а татын кинэз но ӧй вал! удмуртэз но, ӟучез но, бигерез но, порез но, эстонэз но, вепсэз но, болгаринэз но,...) но экто пӧртэм калыкъёслэсь эктонъёссэс. И ваньзы шудоесь!

О! Ваньзылэсь сюлэмзэс гомӟытӥты еит болгаринъёс но болгаркаос. Шикарно! Сыӵе яркыт, чебер дӥсьёссы! Асьсэос но бен кыӵе чебересь вылэм! Особенно нылъёссы. Чиль сьӧд йырсиоссы, пеймыт синъёссы...А мылкыдзы! Соослы сыӵе кельше эктыны, сыӵе яратыса соос сое лэсьто! Кайфуют в общем. Шоразы учкыса султэм ик потэ вал эктыны бордазы!

Жанна ужаз быдэс нунал эктыса но, "Эктон коркаын" шутэтски, пе. 

Ӵемгес мед ортчысалзы таӵе эктон коркаос. Тросэз, дыр, мынэмзы потса но ӧз лыктэ, мкш пыронэз ӧтёнъёсъя гинэ вал.

Выставка

Ветлӥ туннэ Л.Молчановалэн выставкаяз. Люба ӧтиз. Диплом гожъялоз со дорын.

"Палэзян" фестиваль мынон радын туж тупаз кадь адӟытонлэн усьтӥськемез. 

Эстонъёс, вепсъёс кырӟазы. Лена Каракулова Быдӟым крезен шудӥз. Пигонъёс ик пештырско, сыӵе чебер. Сыӵе капчиен чиньыосыз крезь сиос вылтӥ бызьыло. Синмаськисько.

Сыӵе аспӧртэмлыко костюмъёс малпаллямын. Кыӵе ке но животъёсын, инкуазен герӟамын. И шокан но пытсаське кадь, и кышкыт но. 

Туннэ "Эктон корка" на!

Огшоры дышетскон нунал

Дото маке йыры кур вал туннэ. Кызьы ке нунал кутске, озьы -а мар-а.

Таяз арняе мон "каморкаын" урокъёс нуисько. Нырысетӥ урокысен ик классэлэн дышетӥсьсы ӧсэз усьтӥз но, пукон пуктӥз. Пияшелэн папаез пукоз, пе. Каморкае, конечно же, со ӧз тэры. Пуктӥз пукон коридоре, ӧсэз усьтыса. Мон, конечно, котьку шумпотӥсько анай-атайёссы урокамы пуко ке, мкш сыӵе пиналъёс умойгес дышетскыны туртто, тыршогес, анайёссы быгато ни юрттыны дышетон амалъёсме адӟыса. 

Но татын, вождэс эн вае, урок шорын, юатэк-вератэк озьы каро. Азьло номыр ӧз йӧты кадь. Собере тулкымъяськыны кутски. Малы ке но. Классэз бен ӵаш-маш, дышетӥсьсы тӥрлыга кадь но, конечно. Пиослэн ымзы уг но пытсалляськы, котькӧня  замечание лэсьты. И быдэс урок озьы тӥни сурум-бурум ортчиз. Нече се училка малпаз, дыр, Егорлэн папез. Малпасько вал, дорам лыктыса юаськоз шуса но, ӧз. Паймыса ик классазы утчаны мынӥ...Ас мылкыдызъя лыктэмын ӧвӧл вылэм. Дышетӥсьсы косэм, поведение хромает, пе. Мда. Мылкыдтэм, номыре кулэ карись анай-атайёс шуса аслым йырам галочка пуктӥсько.

Ньыль англи урок нуэм бере бызьыса мынӥ кыкетӥ классэ удмурт кыл нуыны. Со вискын нуназе сиёнме ӝогак ньылӥ, кабын ньылӥ, мкш сии сое шуыны уз луы. Собере эшшо кык англи урок но удмурт кыл кыкетӥ подгруппаен...

3с - со кадетъёс. Яратӥсько та классэз. Только туэ туж алякесь, невозможно. Ымзэс мырдэм-мырдэм пытсасько. Чалмытскытозязы номыр уг куаретӥськы, асьсэос валаны кулэ ни, урок кутскем бере ӧвӧл вераськоно шуса. Туннэ мыным выдали: "Разрешаем начать урок!" Усько вал ин интыысьтым))) Кылем уроке бен юай вал чалмемзы бере, яра ни-а урокмес кутскыны шуса но, йыразы кельтӥллям.

Каморкамы вай-фай роутер вань, однако, кудӥзлэсь парользэ малы ке но мон уг тодӥськы на...Тодоно! Та кадетъёсы ик туннэ гинэ адӟиллям. О, вай-фай, пе, монэ куспетӥ карыса ик. Ӧй тышкаськы, кӧня можно шуса. Вӧсяським "Всемогущий Вай-Файлы", парта вылэ ик гадьёсынызы выдылӥзы, киоссэз вылӥе ӝутыса. Ӧй ни чида, пальпотӥ. Котькуд урокын таре тодазы ваёзы ин.

Дневниказы всё равно замечаниос гожтӥ. Усьтӥ но,

а отын: "Ув. родители! Ест лимонную кислоту, объясните, что это опасно!"

Ааааааа! Ӝӧк улам пырса гор-гор серекъяме потэ вал!  Яке бӧрдоно-а таӵе учыръёсы? Шуисько, воксё-а мар-а ни, ку-ку? Быдэс  классы сием! Ужас! Самой тунсыкоез, лимонной кислота ваем нылаш, кудӥз туж мусо но визьмо. Воксё пайми. Эше, пе, вераз, озьы сиёно шуса. Оломар но.

Предпоследний урокам каморкаямы завхоз завучез вайылӥз. Учке, пе, кытын соос дышетско. Тыл, пе, потӥз ке, кызьы соос эвакуироваться кариськозы. И шоканы но номырин, сыӵе ӝокыт!  Конечно! Ог-огзылэн йыр вылазы пуко но пиналъёсы!

Нормальный класс сётом, дыр, шуизы. Хоть бы, хоть бы, хоть бы! Тьфу-тьфу-тьфу!

Тямысысен куинь но ӝыныозь (8 урок) дугдылытэк вераськем бере, трос пол заваритьтэм чай пакетик кадь потко аслым. Нокинэн вераськем но уг поты. А мукет дышетӥсьёс дас но, дас кык но урок нуо. Мискиньёс.

Висись дышетӥсь

Температура. Самой дурацкий. 37. Больничной но уд куты, адями но ӧвӧл. Школаысен шӧдӥ ин, температурае вань шуса. Кужым ӧвӧл, пыдъёс вата кадесь, ньылон бичатэ, йырын тук-тук вазе, ваньмыз чузъяське.

Понедельник. Пиналъёс шутэтскон  нуналъёс бере лӧптэмынэсь, лабырто, кесясько, серекъяло. Йыр пилиське. Аааааа!Ладно коть куать гинэ урок. Куараме ӧй ӝуты. Дасозь но, кызёзь но, витьтонозь но лыдъяй, асме киям кутыны вырса. Чалмытскылӥзы. Асьсэос. Мар ке но та умой ӧвӧл шуса.

Кужым да чидан. 

Сӥзьыл Кекоранын

Самой секыт нунал - со арнялэн ӝытэз. Сыӵе городэ кошкем уг поты! Тем более огнам!

Гуртын сыӵе умой! Спокойно. От души.

Туннэ куазь кыӵе ке но мистической вал...Зыл-зыл бус васькиз, бинялтӥз коркаосты, бусыосты, бакчаосты. И чал-чал...Куддыр-куддыр поездлэн ортчемез, кесяськемез кылӥськылэ...Куддыр одӥг-ог пуныос утыло. Ӧй чида. Васяез почи китӥз кыскыса поттӥ кыре, классный фотографиос лэсьтыны можно шуи.  Мамез монэ "больная" пе))) Ымме усьтыны ӧй вуы, озьы монэ мед шуоз шуса. Одӥг кадь малпаськиськом, лэся.

Поръялскеммы бере эшшо но секытэн кошки на городэ.

Кӧня ке гурт лукъёс.

Коньыос

Туннэ вал кыӵе ке но сумасшедший нунал. Таяз арне мон кабинетъёстӥ ветлӥсько на эшшо(черодэн вошъяськиськом ӵош ужась дышетӥсен). Маке замоталась оглань-талань кабинетысь кабинетэ ветлыса. Одӥг урокын эшшо шоканэ ик пытсаськыны кутскиз кадь...Пиналъёс но мар ке кадь лӧптэмынэсь вал. Буйгатыны но туж секыт. Ох! Ну, конечно же, буйгатӥ...

Нунал пумын гинэ мылкыд ӝутскиз кадь. Удмурт кыл. Берпуметӥ, тямысэтӥ урок. Кызьы нуом на шуса мынӥ, мысленно киосме вылӥе урдыса, вай мыным кужым шуи. ..

Нуназе котыртӥм тэтчазы вал ин удмурт пиналъёсы. Ай эшшо дежурнойёс соос. Котькуд адскемлы быдэ ӟечъясько. Куинь кылын. Ой дото мусо кылӥське дак! Мылкыд ик ӝутске. Так вот, тэтчазы вал ни котыртӥм, удмурт кылмы туннэ вань а шуса. Мар шумпотӥзы, луоз шуи но! Эшшо тетрадь вылъёсазы удмурт кылын нимъёсынызы подписьёс дасяй, и жетончикъёс.

Ой, жетончикъёс со мукет ужпум. Удмурт кылын соос отметка уг бичало. Но мотивироватьтон понна, соос жетонъёс люкало. Кылем арын одӥг четверть "ӟечок" жетон, мукет четверть "гондырпи" жетон люказы. Сэре четверть пумын лыдъяса пото но, вормисьёссэ кыӵе ке но пичи кузьымен пусйиськом. Кылем арын нырысетӥ интылы удмурт выжыкылъёсын диск кузьмай, мукет ньыль дышетскисьлы удмурт нылпи кылбуръёсын бичет.

Туэ пиналъёсы люкалозы коньыосты. И что, шуо, деньги что ли? Сое но соос тодо))) Или белочек? Оо, шуисько, белочек. 1,2, но 3 коньы быгато басьтыны. Ӧректэмынэсь. Туннэ ӧй на сёты. Ӵуказе, шуи, конвертъёстэс вайиды ке. И ведь ваёзы, ваньзы.

Одӥг пол удмурт кылын мультфильм возьматӥ но, табере сьӧрысьтым уг кылё ни, ми туннэ мультик учком-а шуса. Кызьы-о меда вералом, удмурт кылын мультикъёс одӥг киысьтым чиньыосам лыдъямон гинэ шуыса. Пальпотӥ гинэ но, ум шуи. Мынам туннэ пичи сюрпризэ вань шуи.

Гужем пумын "Светӥ доры куное" ветлыкум, верай вал, видео блог лэсьтэме потэ шуса. Всё, кисьмам, лэся. Пичи малпанъёсы но кылдӥзы, пуксизы кадь йӧн-йӧн. Ато уг тодӥськы вал, кыӵе формаен сое лэсьтыны. Кылъёссэ лыдӟи пиналъёслы но, ваньзэ валазы! Бен, мае ке кылем арын дышетӥм, сое ик пыртӥ вал. Со ик вал пичи сюрпризэ.

Табере кисьманы то кисьмам ай но, шугъяськонъёс азьпалан султӥзы.
1. Пиналъёсы туж но туж загруженноесь, свободной дырзы почти ӧвӧл снимать карыны((((
2. Сниматьтыны то мон соосты снимать каро, но вот монтироватьтон пумысен секытгес. Лилия Николаевназы Movie Maker-ен сяна номырин выремез ӧвӧл. Бен главное мылкыд, конечно! А мынам потэ, пиналъёсылэн та тылзы, удмурт кылэз но культураез дышетон мылкыдзы медаз кысы шуыса, эшшо но эшшо мед пуромоз гинэ шуса!

Ӵош ужась эше, удмурт маке,шуэ туннэ, соосыд, пе, тынад удмурт кылэн вообще восхищаются кадь.

Пичи бадӟым шумпотон

Адями сыӵе ӝог вань умоезлы дыше! Ужас!

Туннэ ӝыны час пӧсь душ улын сылӥ, дыр. Выль адами луса ик, капчи мылкыдын потӥ. Ну еще бы! Быдэс толэзь чайникын ву пӧсятыса, тазын пыласькы ай но!

А ведь гуртын но пӧсь ву ӧвӧл. Мунчоын гинэ. Вот дышемын городын пӧсь ву луыны кулэ шуса и всё. Гуртын ӧзьы ик улӥськод но улӥськод кадь. тусьты-пуньы но миськыны ву шунтӥськод, ӝытазе пыдъёсты но миськыны шунтӥськод. А городын ведь, нет, средствоен да кезьыт ву улын тусьты-пуньы миськисько.

Сыӵе пичи бадӟым шумпотон! Пӧсь ву сётӥзы шуса шӧдэме бере, кема пальпотыса киме кран улын вози! Медаз ни кысэ вылэм! Кыӵе ке аномально ӵем тӥяськись линиямы милям.

Чувак

Толон тётяе звонить кариз. Дышетӥсьлэн нуналэныз ӟечкылаз да мар да. Кызьы шкаф вакчиёмытыны юа, лобзикен-а, циркуляркаен-а пе. Мон, значится, ымнырме визьмо кари но(урокын кадь ик), шуисько, циркуляркаен, ручной циркуляркаен. Эшшо-а мар-а, шуэ, вань на кыӵе ке? Мон ымнырме эшшо но важнойгес карисько на (нокин но уг адӟы ке но). Дак, шуисько, конечно, стационарноез вань на. Валэктӥ на, кызьы пероен ӟирылы пасьсэ портоно. Я, шуиз, тау за консультацию, дото таре кинлэсь юаны)))) Мон сыӵе ик деловой ымнырын шуисько обращайся!

Куд ог нылъёс даже сыӵе кылъёсты но уг тодо, предметъёс сярысь вератэк ини. Циркулярка, лобзик, струбцина, шуруповёрт, фрезер, перфоратор и эшшо трос трос сыӵе штучка-дрючкаос! Мон туж неплохо соосын разбираться кариськисько ини. Сыӵе инструменты магазинын но капчи быгатысал ужаны, дыр))))

И мыным со яра! Котьку но шумпотӥсько, мае ке выльзэ тодӥсько ке! Вася шуэ: свой чувак!

День учителя

День учителя. Кыкетсэ улонам. Куке мон дышетӥсь. Пятницае ортчытӥзы школаын.Уже бергес мынӥ. Соин ик трос ик пиналъёсты ӧй адӟы ни: соос кык час гинэ дышетскизы. Традиционно, бадӟым классъёс урокъёс нуизы.

Та школаын, кытын мон ужасько(милям шуыны кыл малы ке но уг пыры, Пороз школа ик со-милям), дышетӥсьлэн нуналаз пиналъёс пӧртэм сиёнъёс пӧраськыса ваё. Дышетӥсьёс сэре учительскойын соосты веръяло но дун пукто. Номыр но ӧз пыры, одӥг торт кусочек мырдэм сии.

Вань дышетӥсьёсты "кафеын" люказы. Бен 1/3 лыктӥзы шуи ке, пӧяло, дыр. Мыным нылъёс, кудъёсыз дасязы ми понна, дышетӥсьёс понна, жаль потӥзы. Кин ке олимпиадаын вал(таӵе нуналэ пуктод-а вылды олимпиада, ма сярысь управлениын малпасько?), кин ке дораз бертэм, кинлы ке вообще дунне! Нылъёс пӧртэм конкурсъёс малпаллям, тунсыко вал, в общем. Но пумаз дасо адями пӧлысь милям командамы кылиз 4 адями! Со просто неуважение...

Конкурсъёс бере концерт вал. Мылысь-кыдысь учки! Золгес чаби, чыртыме золтыса ик учки началкаос шоры, соосын ужасько бере. Сыӵе ӟечочекъёс! Чылкак мукет синмын учкыны кутскиськод соос шоры. Чабисько, кесяськисько, шуламе ик потэ вал( туж жаляй, уг быгатӥськы шуса). Котырам учкисько но, кудъёсыз дышетӥсьёс уг но чабо! Кызьы?! Ну кызьы вылды нылпиосыдлы уд чабы!? Соос ведь вань сюлмысь. Удмурт классэлэн дышетӥсьсылы шуисько, мар сыӵе ваньзы пассивноесь шуса. Тау шуэ шу, тон шорад кырыж уг учко на шуса...Мда уж... Концерт бере директор сцена вылэ потса ӟечкылаз, залысь бадӟым классъёс со дыре потӥзы. Мон чуть шара не ахнула!Ӝынылэсь тросэз залын пиналъёс пуко вылэм! Кытын дышетӥсьёс? Кин понна ваньмыз та лэсьтӥське? Профсоюзной азьветлӥсь ӟечкыла...открыткаысь кылбур лыдӟыса...Котькуд методобъединенилы торт сётӥзы. Англи кылын дышетӥсьёсты ӧй адӟы, видимо, олимпиада эскерыса пукизы...Началкаос ӧтӥзы любезно чай юыны бордазы.

Кыӵе мукет вылэм пушкысен дышетӥсьлэн улонэз. Мукет синмын учкыны кутскисько. Гуртын, конечно, мукет югдур. Куке коллективын сизьымдонлэсь трос дышетӥсь, со ноку но одӥг бадӟым семья кадь уз луы. Тем более нылкышно коллектив.

Бонус

Лапик

Папа туннэ Лапикез ватӥз. Жаль но туж, капчигес но луиз кадь.

Мон ньылетӥ-а, витетӥ-а классын дышетскисько вал, Элябас дорысь кучапи васькытӥ. Сыӵе со туж пичи гинэ вал. Нырысь уйзэ улӥын коробкаын со кӧлӥз. Точнее, быдэс уйзэ вузыса но нискетыса улӥз. Да что за кучапи, кӧлны но уг сёты шуса быдэс уйзэ валес вылам бергам. Нош ӵукна султыса кучапиенымы бызьылӥм, шудӥм.

Малы ке но семьяямы вань корка пудо-животъёслы мон ним тырылӥ. Тазэ ӧй тоды кызьы ниманы, мамалэсь юай, кызьы соослэн пунызылэн нимыз вал Кион-Липетоын улыкузы. Лапик, пе. Озьы ик нимам. Лапик. Мусо. Дядяе со пышкылыса Пыдӥк шуэ вал.

Лапик, Лапик. Сыӵе со мусо потэ вал. Гонэз кыӵе ке но сайкыт, персиковый. Нырыз пеймыт льӧль, котьку но кезьыт, озьы ик луыны кулэ. Кӧня ми со нырзэ исаса улэмын... Быжыз котьку но кульчое биниськемын.

Лапик, Лапик. Со воксё но лек пуны ӧй вал, визьмо. Синъёсыз но туж проницательноесь. Лек ӧй вал ке но, ужзэ аслэсьтыз тодэ вал. Корка котыр- со солэн территориез. Ми утэмезъя валаськом вал, ма солэн верамез потэ. Кин ке  мукет адями пыре ке-мызон утэ, сиськемез ке потэ-мукет, пуныосты ке шӧдэ-мукет.

Лапик, Лапик. Сомында ар ӵоже тон милям семьямылэн ёзэз луид. Мон али вообще не представляю Лапик  интые кыӵе ке но мукет пуныез. Ми соин будӥм, ми кошким дышетскыны, со кылиз. Но бертэммылы быдэ со милемды тодма вал, интыяз тэтчаны кутске вал.

Э, Лапике. Берло кык аре вообще туж зол шӧдӥськиз пересьмемез пунымылэн. Азьло синъёсыз бездӥзы. Сэре валам, уг но кылы ни шуса. Но зато ульча кузя ветлыны, ӧсъёсты усьтыса азбаре пырыны вала вал. Мама кемалась вера вал ни, усыпить кароно ни вал та пересьмес шуса но. Мон ӧй лэзьы. Туж секыт быръён ук со! Сомында споръёс мыно адями эвтаназия сярысь, нош татын пуны. И сыӵе секыт! Мон шуисько вал мамалы, со быгатэ на ук сиськыны, ветлыны, шоканы, улыны, кызьы виёд сое?!

Таяз выходнойёсы бертылыкум, мон валай, КЫӴЕ со курадӟе шуса. Пельёсысьтыз оломар быдэс ымныраз сутыса васькемын ин, синъёс уг адӟо, пельёс уг кыло, пуны пушкысен СИСЬМЕ ин! Мыным урод луиз, зэм. Соку мон доры дошло, со издевательство шуса. Папаез бӧрдыса сямен кури медаз ни курадӟыты шуса, мед усыпить кароз ни шуса.

Туннэ ватэм...Половике бинялтыса ватӥ, пе...Умой кӧл ни, Лапикмы! Вождэ эн вайы сомында курадӟытэммы понна...

Удмуртятаос

Удмуртятасылы (завучмы озьы шуэ) Сепысь пиналъёслэсь лэсьтэм "Мультиксэс" возьматӥ. Пайми но шумпотӥ. Троссэ валазы, кылӥзы. И как раз сыӵе кылъёсты ик дышетӥм вал: писпу, сюрес, корка...Мукетъёссэ кылем ар тырысь тодо. Дышетӥсьсы но паймемын вал. Туж троссэ тодамы вайимы со мультикез учкыса: нимез, аресэз веран, буёлъёс, животъёс, сиён, каронкылъёсты. И ваньмыз со сыӵе аспӧртэмлыко формаен. Ми котькуд пиналлэсь верамзэ пыр-поч эскерим, удмурт но, ӟуч но кылын выльысь вераса потӥм.

Мон ӝыны та ӝыны классэз англи кыллы но дышетӥсько. Туж тунсыко чакланъёс аслым лэсьтӥ. Милям кыкетӥ классъёс вить параллель, ваньмаз ик классъёсын мынам урокъёсы вань. Так вот, тужгес но ӝог схватывают и йыразы кельто как раз-таки удмуртятаосмы! Маин со герӟаськемын, мон пырак вераны, конечно, уг быгатӥськы. То ли, дышетӥсьсы зол луэмен, то ли одӥг "иностранный" кыл дышето ин-а шуса. Удмурт кылэз ведь соос иностранноез кадь дышето. Али но син азям сыӵе сцена, куке мон юай-эскери кылъёсты, кудъёссэ ми вуим ни англи кылын дышетыны, соос ваньзы интыысьтызы тэтчаса ик вераллязы мыным со кылъёсты. Нош мукет классъёсын одӥг-кык адями гинэ вераны быгатӥз, и туж но туж секыт мынӥз ужмы.

Четверге нуназе милям англи кыл, нуназе бере-удмурт. Тодӥм вал выль кыл: писпу. А ведь, шуо, англи кылын писпу-tree. Кыӵе тӥ ӟечокъёс, шуисько! Соос мыным куинь кылэз ӵошатыса кык цепочка веразы ини. ПИСПУ-TREE-ДЕРЕВО. КУАКА КАР-NEST-ГНЕЗДО. 

Медаз мылкыдзы кысы вылэм кылъёсты дышетыны!Тьфу-тьфу-тьфу!

Эляба

Эшшо та выходнойёсы ми Порозэ но Кекоранэ но вуылӥм. Дото чупыресэсь бен!)

Вань ӵыжы-выжыосме Порозысь адӟыны вуи. Пичи нылмес яратӥ. Мазэ вешаны но вань ин даже! Позитивчик!

Элябабен трос вуим вераськыны. Паймыса уг быдтӥськы мон солы! Мае но уг тоды, осто! Бен газет лыдӟе, телевизор учке, радио кылзӥське. Ооо, шуэ, кыӵе адямиос вуиллям, радио-телевизорысь,пе, ӵемгес тӥледыз адӟиськом-кылӥськом ми. Ой, Эляба. Мон сое озьы гинэ шуко.

Богданэн Оля Тронинаен Америкае ветлӥллям шуэ. Юля Никитина бызем но Шапкина луэм шуэ. Да ӧвӧл, шуко, Шахтина. Да пе Шапкина шуизы. Ӧвӧл, ӧвӧл шуко. Э,пе, мон озьы кылӥ. Бен пе, газетын быдэс разворот со сярысь гожъямын, Америкаысь бертэмез бере радиое но ветлӥз ин. Кинлы быземме верай, но мамае паймиз, пе, шуэ. Элябен дедоен Юлялэсь мамассэ тодо но, соин матын-а мар-а потэ со соослы. Озьы маде.

Со вань кырӟасьёсты в лицо тодэ, арлыдооссэ но, егитъёссэ но. Куке "Елена" кафее Влад Андреевъёс да мар да вуылӥллям. Так Эляба кытысь ке кырӟамысь бертэ вылэм но, доразы лыктыса тыбыразы ик вешам) 

Куке сентябрь кутсконын на звонитьтэ мыным и шуэ, Дарали, пе, радиое ветлӥз. Сарапулэ, пе, улыны кошкисько шуиз. Олома, конечно, Дарали вераськем ин но, таиз сюлмаськыны кутскем ин. Соос чӧш сюанэ Порозэ кемдылӥллям, соин ик тожо тодмо адями каре. Мон маке трубкаме кутыны ӧй быгаты соку ик, 3-4 пол звонитьэмын вал. Ваньзэ, шуэ, малпай ин, кызьы "Дартэз" но, "Сахарез" но улоз. Да, шуисько, эн сюлмаськы ай. Шуак озьы султыса уз кошкы ай))) Олома но.

Яра мыным соин вераськыны. От души. Только вот пыдыныз курадӟе туж(((( 4-5 ар талэсь азьло,дыр, толалтэ сике куасэн мыныса, усем но, пыдзэ чигтэм. Табере уг бурмы ни йӧнала. Всё равно ведь интыяз уг пукы, олокытӥ но кырӟаса, выступать карыса, юмшаса ветлэ. Озьы ик улоно!

Егит удмурт анайёс

А еще милям Манкизъёслэн пополнение! Кык манкилы трос луим ин!

Мон сыӵе шумпотӥсько Снежочек но Регинчик понна! Мамочкаос ни табере ведь! Уг но оскиськы мукет ласянь. Дышетским, улӥм, шузияським, дискотекаосы ветлӥм ӵош. И соку ми асьме понна гинэ кыл кутӥм. Табере озьы уз луы ни. Табере соос вӧзын луло пичи адямиос, кудъёс понна соос сюлмаськозы, уйзэс уз кӧлэ, ветталозы, яратозы! Со туж классно!

Ми тӥледыз туж яратӥськом, нылъёс! И зарни комочекъёстэс но тожо яратӥськом ини! Адӟеме потса уг быгатӥськы ни.

Туала фест

Пятницае "Туала фестэ" ветлӥм вал. Только вань мылкыдме, бертэм бере, общагаысь потоп быдтӥз. Соиз сярысь берло. 

Мон сыӵе пайми и ӝожоми, куке адӟи, кӧня адями лыктӥз концертэ. Ведь адямиос дасясько, дырзэс кужымзэс быдто. Ведь кинлы ке лэсьтӥсько со концертъёс. Адямиос сыӵе лэся компьютеръёссы, телевизоръёссы борды думиськылэмынэсь, лякиськылэмынэсь ин, лишний раз берпалзэс ӝутэмзы но уг поты ни. Удмуртъёс ӧжыт вал, кызьы выяснила сцена вылысен Света Ручкина. Бен оо, пятница ук, ваньзы доразы бертылэмынэсь. Мон эшшо раз аслым пусйи на, кыӵе удмурт позыръяськонъёслэн продуманной нуналзы шуыса-четверг.Уг тодӥськы, кӧня вал калык субботае, но, малпасько, трослы ик пятницалэсь пӧртэм ӧз луы.

Огъя мыным Туала фестлэн нырысетӥ люкетэз кельшиз. Тросэз, конечно, Silent woo goore группалы луыса. От души. Азьло неуверенногес ик выризы кадь, Света микрофон нуллӥсь но луылӥз, но сэре пумен-пумен ӧраз пыризы но "сутӥзы". От души.  Т.Галиханов кошкемен, конечно, группа трос ыштӥз. Вот со мыным ӧзгес тырмы. А как ведущий (нуисьёс вал Толя Галиханов но Наташа Ушакова) мыным ӧзгес кельшы-а мар-а, тросгес кадь вити солэсь. Бен мар-о, в своем стиле, но шуточкаосыз определенной адямиослы гинэ. Сцена вылысь, тем более филармония сцена вылысь "эти тела, сидящие в зале" нокызьы но уд шуы кадь. Тулкымъяськиз, луоз, антракт сярысь но вунэтӥз бере.

Модалиосты ми профессионалэн, с профессиональной точки зрения учким. Маиз ке кельшиз, маиз ке ӧз. Шаркан-трикотажлэсь, конечно, шокын. Мон уг быгатӥськы валэктыны, МА со сыӵе вал. 

Та дырозь ортчиз ни вал час но ӝыны, эшшо сэре Мордовиысь OYME группа потӥзы на. Соос, конечно, туж аспӧртэмлыкоесь, тунсыкоесь, но туж трос, перебор трос сцена вылын зулё. Ми 5-6 кырӟанзэс кылзӥм но кошким, бер вал ини.

И мар, бертӥм но, общагаын полный капец! Кухняын мойкаысь вуэ выллань тубе. Вань соседъёсты сайкатӥм, трубамы остатки прорватьтӥз на. Тазъёсын, ведраосын, тряпкаосын ваньмы бызьылӥськом! Купальникъёс гинэ дӥсяны уг тырмы на вал! Кобыен пол вылысь вуэм омыръям! Улысьтымы этажэз залили, конечно же. Кин ке бервыл вуэз октыса-октыса пӧсь вумы но ӧй вал, эшшо со тазикъёсын ик пыласьконо луиз на ву шунтыса! Вань мылкыд быриз, пыласьки но кӧлны выдӥ.