Гуртын

Пуксьылыны дыры ик ӧй вал.  1 июле отпуске потӥ но, гуртэ бертӥ. 56 нунал азьпалан! Ииххааа! Кунгож сьӧры шутэтскын гужем ум мынэ нӥ шуса малпам. Так но котькуд шутэтскон нуналъёсы кыӵе ке но ужрад. Дорын но туж трос уж.

 Гуртэ бертыса ма но ужаны ӧй вуы на мон! Нырысь ик, ваньзы дортӥ кунояса ветлӥ. Пичи Лерамес яратӥ-вешай (солы 4 толэзь гинэ ай), удмурт кырӟанъёс кырӟай солы – туж сак кылзӥське, мусо удмурт пуклёке. Узыяны ветлӥ, турын октӥ-калтӥ, пастухе ветлӥ. Пастух сыӵе умой кутскиз вал ӵукна: шуныт, шунды яркыт пиштэ, кутъёс ӧвӧл, лудын боры кӧня! Нуназе бере пилемъёс люкаськыны кутскизы. Куинь часын зорыны кутскиз. Зоре, чилекъя,гудыръя, тӧлаське. Я, пилем кошкиз кадь. Кӧня ке улыса, нош со пилем ик берытскыса вуиз. Эшшо золгес гудыръяз, чилекъяз, зориз! Кӧс интыез вылам ӧжыт гинэ кылиз, сать-сать котмыса бертӥ гуртэ. Вот, кин ке йӧл ю, кин ке пастухе ветлы сэре.

Толон  коркасьтымы гур сэрттӥм куинь кузя: мама, папа, мон. Ма со вал! Ма со пыль, ма со жаг. Мон  чёрт кадь сьӧд-сьӧд курми. Вить час сэрттын вырим. Вот малы милям братмы ӧвӧл? Со ведь воксё кышномурт уж ӧвӧл. Бен ми мамен монтировкен только так ужам «ломать- не строить» шуса. Секыт, секыт. Туннэ киос но, мугор но висе. Ай толон сэрттэм бере, вылӥзэ но, улӥзэ но быдэс миськи на полъёсты. Ну, миськи шуыны со, конечно, зол верамын. Пыльзэ ӵушылӥ шуоно,дыр.

Туннэ мама ӵукна ик сайкатӥз ин, борыаны айда мыном шуса. Мырдэм бур синме усьтӥ, сэре озьы ик паллянзэ. Паллянзэ усьтӥ но,бурыз пытсаськиз. Сэре кызьы но озьы но султӥ ик. Мамалы боры, пӧй, сомында-сомында и сыӵе ыльысэсь шуи вал пастухе  ветлыкум. Мылкыдыз ик ӝутскем лэся. Билибе мыныны малпам. Отын котьку лачак боры луэ. Элябабез, дедоез кутӥм (отын улэмынэсь бере, интыосты тодо), сэ тётя Светэз кутса Кипунысь, Шаркан пыр мынӥм. Мон руль сьӧрын. Туж ӵем гуртын ворттылӥсько али. Папамы пешеход луиз ин))

Боры,короче, ӧжыт вылэм Билибын. Мон маке туж пайми. Порозын ке боры сомында, Билибын эшшо тросгес луоз на, малпай. Не тут то было. Мама 10 литръем ведра кыкнамылы кутом шуэ вал, мон со ӧжыт шуи, и сьӧрад вэтлыса уг улы, пӧй. Аслыз пичизэгес кутӥз, а мыным таиз, бадӟымес кылиз. Ӧй тырмыты. Мылкыды ӧз тырмы нӥ. Утчаса ветлыса уг яратӥськы. Мон пуксьысал но озьы октысал. Я, одӥг кадьгес октӥм лэся ваньмы.